ᐃᖃᓗᐃᑦ
ᑭᒡᓕᓯᓂᐊᖅᑕᐅᓯᒪᔪᑦ
ᓇᓚᐅᑦᑖᖅᑕᐅᓯᒪᔪᑦ ᐊᑭᖏᑦ: $750 M
ᑐᕌᒐᕆᔭᐅᔪᖅ ᓴᓇᔭᐅᒋᐊᕐᓂᖓ: ᐅᑐᐱᕆ, 2028
ᑐᕌᒐᒃᓴᖅ ᓯᕗᓪᓕᖅᐹᒥ ᐆᒻᒪᖅᑯᑎᓄᑦ: ᑎᓯᐱᕆ 2030
ᑐᒃᓯᕋᐅᑕᐅᔪᖅ ᐆᒻᒪᖅᑯᑎᖃᖅᑎᑦᑎᓂᕐᒧᑦ: ᐃᒪᕐᒧᑦ ᐆᒻᒪᖅᑯᑎᖃᖅᑎᑦᑎᓂᕐᒧᑦ
ᐃᓄᒋᐊᖕᓂᖏᑦ
ᖁᑦᑎᖕᓂᖅᐹᖅ ᐆᒻᒪᖅᑯᑎᓄᑦ ᐱᔭᐅᔪᒪᔪᖅ
ᑐᒃᓯᕋᐅᑕᐅᔪᖅ ᑐᑭᓯᒋᐊᕐᕕᒃᓴᖅ
ᐅᖅᓱᐊᓗᒻᒧᑦ ᐊᑭᓕᖅᓱᐃᓂᖅ
ᑭᒡᓕᓯᓂᐊᖅᑕᐅᓯᒪᔪᑦ
ᓇᓚᐅᑦᑖᖅᑕᐅᓯᒪᔪᑦ ᐊᑭᖏᑦ: $750 M
ᑐᕌᒐᕆᔭᐅᔪᖅ ᓴᓇᔭᐅᒋᐊᕐᓂᖓ: ᐅᑐᐱᕆ, 2028
ᑐᕌᒐᒃᓴᖅ ᓯᕗᓪᓕᖅᐹᒥ ᐆᒻᒪᖅᑯᑎᓄᑦ: ᑎᓯᐱᕆ 2030
ᑐᒃᓯᕋᐅᑕᐅᔪᖅ ᐆᒻᒪᖅᑯᑎᖃᖅᑎᑦᑎᓂᕐᒧᑦ: ᐃᒪᕐᒧᑦ ᐆᒻᒪᖅᑯᑎᖃᖅᑎᑦᑎᓂᕐᒧᑦ
ᐃᓄᒋᐊᖕᓂᖏᑦ: 7,430
ᖁᑦᑎᖕᓂᖅᐹᖅ ᐆᒻᒪᖅᑯᑎᓄᑦ ᐱᔭᐅᔪᒪᔪᖅ: 10,300 kW
ᑐᒃᓯᕋᐅᑕᐅᔪᖅ ᑐᑭᓯᒋᐊᕐᕕᒃᓴᖅ: 15-30 MW
ᐅᖅᓱᐊᓗᒻᒧᑦ ᐊᑭᓕᖅᓱᐃᓂᖅ: 100%
ᐱᓕᕆᐊᑉ ᐅᓂᒃᑳᖓ
ᐃᖃᓗᓐᓂ ᓄᒃᑭᒃᓴᐅᑏᑦ ᐱᓕᕆᐊᖅ ᐊᓯᔾᔩᔪᓐᓇᕐᒪᑦ ᓄᓇᕗᒻᒥ ᐆᒻᒪᖅᑯᑎᖃᖅᑎᑦᑎᓂᕐᒥᒃ ᓄᓇᕗᒻᒥ ᓯᕗᓪᓕᖅᐸᐅᓪᓗᓂ ᐃᒪᕐᒧᑦ ᐊᐅᓚᑕᐅᓗᓂ ᐆᒻᒪᖅᑯᑎᓕᐅᕐᓂᖅ. ᑐᕌᒐᖃᖅᐳᖅ ᑭᖑᕝᕕᖅᑕᐅᑦᑎᐊᖁᓪᓗᒍ ᐅᖅᓱᐊᓗᒃ ᓄᓇᓕᐸᐅᔭᒃᑯᑦ ᐆᒻᒪᖅᑯᑎᒋᕙᒃᑕᖓᑦ.
ᐃᖃᓗᖕᓂ ᓄᓇᓕᖕᒥᐅᑦ ᓂᕈᐊᓚᐅᖅᐳᑦ ᑖᔅᓱᒥᖓ ᐱᓕᕆᐊᒃᓴᒥᒃ 2023-ᒥ ᓂᕈᐊᕈᑎᑎᒍᑦ ᓂᕈᐊᕐᓂᒃᑯᑦ ᐊᕐᕌᒍᒐᓴᖕᓄᑦ ᖃᐅᔨᓴᖅᑕᐅᓚᐅᖅᑎᓪᓗᒋᑦ ᐅᖃᖃᑎᒌᒍᑕᐅᓚᐅᖅᑎᓪᓗᒋᓪᓗ. ᑐᒃᓯᕋᐅᑕᐅᓯᒪᔪᖅ ᐃᓱᒪᒋᔭᐅᔪᖅ ᐊᑐᕋᔭᖅᑐᖅ ᐃᒪᕐᒥᒃ ᐆᒻᒪᖅᑯᑎᒥᒃ ᑰᒑᕐᔪᖕᒥᑦ, 60 ᑭᓛᒥᑐᓂᒃ ᐅᐊᓐᓇᖓᓂ ᑲᓇᖕᓇᖓᓂ ᐃᖃᓗᐃᑦ.
ᐱᓇᔪᒃᑕᐅᓵᓕᔪᑦ
ᐊᕐᕌᒍᑦ ᐊᕙᑎᑦ ᐅᖓᑖᓃᓕᖅᑐᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC) ᑖᔅᓱᒥᖓ ᐱᒋᐊᖅᑎᑦᑎᓚᐅᖅᓯᒪᕗᑦ, ᓂᕆᐅᖕᓂᖃᖅᖢᑎᒃ ᐃᒪᒃᑯᑦ ᐆᒻᒪᖅᑯᑎᖃᖅᑎᑦᑎᔪᒪᓪᓗᑎᒃ ᐃᖃᓗᖕᓄᑦ ᑰᖕᓂᑦ ᕿᑭᕐᕆᔭᕐᕕᖕᒥᑦ (ᔭᐃᓂᔅ ᐃᓐᓚᑦ) ᐊᒻᒪ ᓄᙵᕈᒻᒥᑦ (ᐋᐅᒻᓲᓪ ᑰᖓ). ᐃᓄᐃᑦ ᐱᕙᓪᓕᐊᑎᑕᐅᖁᓚᐅᓐᖏᑕᖏᑦ ᑕᐃᒃᑯᐊ ᑰᑦ ᐱᒻᒪᕆᐅᒻᒪᑕ ᐊᖑᓇᓱᓐᓂᕐᒧᑦ, ᐃᖃᓗᒐᓱᓐᓂᕐᒧᑦ, ᐊᐅᓪᓛᖅᓯᒪᓂᕐᒧᑦ. ᑕᒪᓐᓇ ᐱᔾᔪᑎᒋᓪᓗᒍ, ᐊᒻᒪᓗ ᐊᑭᑐᓗᐊᕐᓂᖏᓐᓄᑦ ᓇᓚᐅᑦᑖᖅᑕᐅᓯᒪᔪᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓄᖅᑲᖅᑎᑦᑎᓚᐅᖅᐳᑦ ᐱᕙᓪᓕᐊᑎᑦᑎᓂᕐᒥᑦ 2014-ᒥᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐱᓕᕆᐊᒃᓴᒥᒃ ᑎᒍᓯᓚᐅᖅᓯᒪᔪᑦ 2017ᖑᑎᓪᓗᒍ, ᐱᔪᒪᓂᖃᖅᖢᑎᒃ ᐱᕙᓪᓕᐊᑎᑦᑎᔪᒪᓪᓗᑎᒃ ᐃᒪᕐᒥᒃ ᐆᒻᒪᖅᑯᑎᖃᖅᑎᑦᑎᓂᕐᒥᒃ ᑲᖓᓚᕐᒥ (ᐅᐊᑦ ᐃᓐᓚᑦ) ᐊᓯᖏᓐᓂᒡᓘᓐᓃᑦ ᐃᓄᐃᑦ ᓇᖕᒥᓂᖁᑎᒋᔭᖏᓐᓂ ᓄᓇᓂ. ᖃᐅᔨᒪᓚᐅᕐᒪᑕ ᐅᖅᓱᐊᓗᑐᐃᓐᓇᕐᒥᒃ ᐊᑐᕈᓐᓃᕐᓂᖅ ᐱᒻᒪᕆᐅᓂᖓᓂᒃ ᐃᓄᓐᓄᑦ, ᑭᓯᐊᓂᓕ ᐃᒃᐱᒋᔭᐅᑦᑎᐊᕆᐊᖃᓚᐅᕐᒪᑦ. ᖃᐅᔨᒪᓚᐅᕐᒥᔪᑦ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᖓᑦ (NNC) ᓈᒻᒪᓈᖅᓯᒪᑦᑎᐊᕐᓂᖓᓂᒃ ᓯᕗᓕᖅᑎᐅᓂᕐᒧᑦ ᐱᓕᕆᐊᒧᑦ. 2020-ᒥ, ᓄᓇᕗᒻᒥ ᐸᕐᓇᐃᔩᑦ ᑕᒪᑐᒥᖓ ᐱᓕᕆᐊᖃᓕᓚᐅᖅᑐᑦ, ᑲᑐᔾᔨᖃᑎᖃᖅᑐᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ.
ᓇᓖᕌᒃᓴᑦ
ᑭᓱᑐᐃᓐᓇᕐᒥᒃ ᑭᑭᑦᑎᕕᑖ? ᖃᓄᕐᓕ ᖃᐅᔨᒪᒋᐊᕈᓐᓇᖅᐱᑕ ᐃᓕᖅᑯᓯᑐᖃᖅᑎᒍᑦ, ᐱᔭᕆᐊᑐᔪᓄᑦ, ᐊᕙᑎᓕᕆᓂᕐᒧᓪᓗ ᓯᕗᓪᓕᐅᔾᔭᐅᔭᕆᐊᓖᑦ ᐊᔾᔨᒌᑎᑕᐅᒐᓗᐊᕐᒪᖔᑕ? ᑕᐃᒪᐃᒻᒪᑦ, ᐃᖅᑲᓇᐃᔭᖅᑎᑖᓚᐅᖅᐳᒍᑦ ᖃᐅᔨᓴᖅᑎᒻᒪᕆᓐᓂᑦ ᐊᒻᒪ ᓴᓇᔨᒻᒪᕆᓐᓂᑦ. ᐃᖅᑲᓇᐃᔭᖃᑎᖃᓚᐅᖅᑐᒍᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᑐᓴᖅᑕᕗᑦ ᖃᐅᔨᓴᐃᓂᖃᖅᑎᓪᓗᑕ ᐃᓄᐃᑦ ᓄᓇᖁᑎᖏᓐᓂᒃ ᐊᒻᒪᓗ ᓄᓇᒥᐅᑕᓂᒃ ᐊᑐᖃᑦᑕᕐᓂᐅᑉ ᒥᒃᓵᓄᑦ. ᐳᓚᕋᓚᐅᕐᒥᔪᒍᑦ ᐃᖃᓗᐃᑦ ᖃᓂᒋᔮᓂ ᖁᓛᒎᓕᒃᑯᑦ, ᕿᓂᖅᑐᑕ ᐃᓂᐅᔪᓂᒃ ᐊᓄᕆᒧᑦ, ᐃᒪᕐᒧᑦ (ᐅᕝᕙᓘᓐᓃᑦ ᑖᒃᑯᐊ ᒪᕐᕉᒃ ᑲᑎᙵᓗᑎᒃ) ᓴᓗᒪᔪᒥᒃ ᐆᒻᒪᖅᑯᑎᖃᕈᓐᓇᖅᑐᓂᒃ ᓄᓇᓕᓐᓄᑦ. ᓄᖑᔪᐃᑦᑐᓂᒃ ᐆᒻᒪᖅᑯᑎᖃᕐᓂᖅ ᐃᓱᒪᒋᓚᐅᓐᖏᑕᕗᑦ ᑕᐃᒪᓐᓇ ᒥᑭᔪᑯᓗᒻᒧᑦ ᐋᖅᑭᑦᑕᐅᓯᒪᓐᖏᒻᒪᑦ. ᓯᕿᓂᕐᒥᒃ ᐊᑐᖃᑦᑕᓚᐅᓐᖏᒻᒥᔪᑦ ᑖᖅᑐᐊᓘᖃᑦᑕᕐᒪᑦ ᐃᖃᓗᓐᓂ ᐅᑭᐅᓕᒫᖅ, ᐊᒻᒪᓗ ᓯᕿᓂᕐᒥᒃ ᐊᑐᕆᐊᖃᖅᑐᑦ ᐊᖏᔪᐊᓗᒻᒥᒃ ᓄᓇᒥᒃ ᐊᑐᕋᔭᕐᒪᑕ.
ᐊᒥᓱᓂᒃ ᑕᖅᑭᓂᒃ ᐱᓕᕆᐊᖃᓚᐅᖅᑎᓪᓗᑕ, ᓇᓂᓯᓚᐅᖅᑐᒍᑦ 16-ᓂᒃ ᐊᔾᔨᒌᙱᑦᑐᓂᒃ ᓇᓖᕌᕈᑎᒃᓴᓂᒃ 100 ᑭᓛᒥᑐᓂᒃ ᐃᖃᓗᐃᑦ ᖃᓂᒋᔮᓂ. 2023-ᒥ, ᓄᓇᕗᑦ ᓄᑭᒃᓴᐅᑏᑦ ᑯᐊᐳᕇᓴᖓᑦ ᑲᑎᑎᑦᑎᓚᐅᖅᐳᑦ ᑖᒃᑯᓂᖓ ᓇᓖᕌᕈᑎᒃᓴᓂᒃ ᑐᓴᖅᑎᑦᑎᓪᓗᑎᒃ—ᓄᓇᓕᓕᒫᑦ ᖃᐃᖁᔭᐅᓚᐅᖅᐳᑦ ᑎᑎᖅᑲᒃᑯᕕᒃᑯᑦ ᐊᒻᒪ ᐱᑐᐃᓐᓇᐅᙱᑦᑐᓂᒃ ᖃᐃᖁᔨᔾᔪᑎᓂᒃ ᐊᐅᓪᓚᖅᑎᑦᑎᓪᓗᑎᒃ ᐱᔪᓐᓇᐅᑎᖃᖅᑐᓄᑦ ᑲᑐᔾᔨᖃᑎᒌᓄᑦ.
ᓇᓗᓇᐃᔭᐃᓚᐅᖅᑐᒍᑦ ᐱᐅᓂᖏᓐᓂᒃ ᐱᐅᓐᖏᓐᓂᖏᓐᓂᓪᓗ ᓇᓖᕌᕈᑎᓕᒫᑦ, ᐱᖃᓯᐅᑎᓪᓗᒍ ᑲᔪᓯᑎᑦᑎᓂᖅ ᐅᖅᓱᐊᓗᑐᐃᓐᓇᕐᒥᒃ. ᑕᐃᒪᓕ, ᓂᕈᐊᕐᓂᖃᓚᐅᖅᐳᒍᑦ—ᐃᓘᓐᓇᑎᒃ ᑲᑎᒪᔭᖅᑐᖅᓯᒪᔪᑦ ᓂᕈᐊᕈᓐᓇᓚᐅᖅᐳᑦ, ᓇᓗᓇᐃᔭᐃᓪᓗᑎᒃ ᖁᑦᑎᓂᖅᐹᓂᒃ ᐱᖓᓱᓂᒃ ᓂᕈᐊᒐᒃᓴᓂᒃ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ. ᐃᓄᖕᓂᑦ ᓂᕈᐊᓚᐅᖅᑐᓂᑦ, 76% ᐊᖏᓚᐅᖅᐳᑦ ᐃᒪᕐᒧᑦ ᐆᒻᒪᖅᑯᑎᖃᖅᑎᑦᑎᓂᖅ ᑰᖕᒥᑦ ᑰᒑᓗᒃᒥᑦ ᐱᐅᓛᖑᓂᕋᖅᑕᐅᓪᓗᓂ. ᑖᓐᓇ ᐃᓂ ᑕᑯᑦᓴᐅᑎᑦᓯᓚᐅᖅᑐᖅ ᐊᑦᑎᓂᖅᐹᒥᒃ ᐃᓄᐃᑦ ᓄᓇᒥᒃ ᐊᑐᖃᑦᑕᕐᓂᖏᓐᓂᒃ, ᑐᓐᖓᕕᒋᓪᓗᒋᑦ ᑐᓴᖅᑕᕗᑦ ᖃᐅᔨᓴᕐᓂᖓᑕ ᐊᐱᖅᓱᕐᓂᕕᓂᖏᑦ ᐃᓐᓇᕐᓂᒃ ᐊᖑᓇᓱᑦᑎᓂᓪᓗ.
ᐃᓕᓐᓂᐊᕐᓂᖅ ᑰᒑᓗᖕᒥ
ᑕᐃᒪᙵᓂᑦ, ᓄᓇᕗᑦ ᓄᑭᒃᓴᐅᑎᒃᑯᑦ ᑯᐊᐳᕇᓴᖓᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑖᖅᓯᒪᓕᖅᑐᑦ ᖃᐅᔨᓴᖁᓪᓗᒋᑦ ᑖᔅᓱᒥᖓ ᓇᓖᕌᕈᑎᒃᓴᒥᒃ. ᐃᖅᑲᓇᐃᔭᖃᑎᒋᓯᒪᔭᕗᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐃᖃᓗᓐᓂ ᐸᓐᓂᖅᑑᒥᓗ ᖃᐅᔨᓴᕐᓂᕐᒧᑦ ᐸᕐᓇᐅᑏᑦ ᐋᖅᑭᓱᖅᑐᒋᑦ ᓄᓇᒧᑦ, ᐅᔭᖅᑲᓄᑦ, ᐃᒪᕐᒧᑦ, ᐱᕈᖅᑐᓄᑦ, ᓂᕐᔪᑎᓄᑦ, ᐊᒻᒪᓗ ᐃᓄᐃᑦ ᐃᑦᑕᕐᓂᓴᖁᑎᖏᓐᓄᑦ ᑰᒑᓗᒻᒥ. ᑕᒪᒃᑯᐊ ᖃᐅᔨᓴᕈᑏᑦ ᐱᒋᐊᓚᐅᖅᑐᑦ 2025-ᒥ, 70% ᐃᓄᐃᑦ ᐃᖅᑲᓇᐃᔭᖅᑐᑦ ᑕᐃᑲᓂ. ᐱᔭᒃᓴᖅᑕᖃᒃᑲᓐᓂᕐᒪᑦ. ᓄᓇᕗᑦ ᓄᑭᒃᓴᐅᑏᑦ ᑯᐊᐳᕇᓴᖓᑦ ᓯᕗᓪᓕᐅᔾᔨᖏᓐᓇᖅᑐᑦ ᐱᔪᓐᓇᐅᑎᖃᖅᑐᑦ ᐃᓚᐅᑎᑕᐅᓂᖏᓐᓂᒃ ᐃᖃᓗᖕᒥᐅᓂᒃ ᐊᒻᒪᓗ ᐸᓐᓂᖅᑑᒥᐅᓂᒃ, ᐊᒻᒪᓗ ᐱᓕᕆᖃᑎᒌᓪᓗᑎᒃ ᓇᓗᓇᐃᔭᐃᓗᑎᒃ ᐊᒻᒪᓗ ᕿᓂᕐᓗᑎᒃ ᐊᑭᖃᙱᑦᑐᒥᒃ, ᓯᕗᕐᖓᒍᑦ, ᑐᓴᐅᒪᑎᑕᐅᑦᑎᐊᕐᓗᑎᒃ ᐊᖏᖅᑕᐅᓗᑎᒃ ᐱᕙᓪᓕᐊᑎᑕᐅᓂᖓᓄᑦ ᑖᓐᓇ ᐱᓕᕆᐊᖅ. ᓯᕗᒧᐊᒃᐸᑦ, ᐱᓕᕆᐊᖑᔪᖅ ᒥᒃᖠᒋᐊᖅᑎᑦᑎᔪᓐᓇᖅᐳᖅ ᓄᓇᕗᒻᒥ ᐅᖅᓱᐊᓗᑐᐃᓐᓇᕐᒥᒃ ᐊᑐᕐᓂᕆᕙᒃᑕᖓᓂᒃ ᐆᒻᒪᖅᑯᑎᓄᑦ ᐱᖓᔪᒋᔭᖓᓂᒃ.
ᐊᒃᑐᐃᓂᖏᑦ ᐃᑲᔫᑎᖏᓪᓗ
ᐃᓚᖓᑦ ᐱᒻᒪᕆᐅᓂᖅᐹᖑᔪᖅ ᐱᓕᕆᐊᖑᔪᖅ ᐱᕙᓪᓕᐊᑎᑦᑎᓂᕐᒥᑦ ᓇᓕᐊᓐᓂᑐᐃᓐᓇᖅ ᐱᓕᕆᐊᖑᔪᒥᑦ ᑐᑭᓯᐅᒪᓂᕐᒥᑦ ᖃᓄᖅ ᐊᑦᑐᐃᓂᖃᕈᓐᓇᕐᒪᖔᖅ. ᐃᒪᓐᓇ, ᐱᓕᕆᐊᖅ ᓴᓇᔭᐅᓐᓂᖅᐸᑦ, ᐊᓯᔾᔨᖅᑐᖃᕋᔭᖅᐹ ᓄᓇᒥ, ᐃᒪᕐᒥ, ᓯᓚᒥ, ᐱᕈᖅᑐᓂ, ᓂᕐᔪᑎᓂ, ᐊᒻᒪᓗ ᖃᓄᖅ ᐃᓄᐃᑦ ᐱᔪᓐᓇᐅᑎᒥᖕᓂᒃ ᐊᑐᖃᑦᑕᕐᓂᖏᑦ ᒪᓕᒃᖢᒋᑦ ᓄᓇᕗᑦ ᐊᖏᕈᑎᖏᑦ?
ᐊᑕᖏᖅᖢᒍ ᐅᓂᒃᑲᐅᓯᖅ
ᑐᑭᓯᐅᒪᓂᐊᕈᑦᑕ ᐊᓯᔾᔨᑐᐃᓐᓇᕆᐊᓕᖕᓂᒃ, ᐃᒪᐃᒋᐊᖃᖅᐳᒍᑦ:
- ᐱᓕᕆᖃᑎᒋᓗᒋᑦ ᐊᒪᕈᖅ ᐊᒻᒪᓗ ᐸᓐᓂᖅᑑᖅ ᐊᖑᓇᓱᒃᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᖃᐅᔨᓴᕐᓂᕐᒧᑦ ᐸᕐᓇᐅᑎᓕᐅᕐᓗᑎᒃ .
- ᐊᐅᓪᓚᖅᑎᑦᓯᓗᑎᒃ ᑲᑐᔾᔨᔪᓂᒃ ᑭᓪᓕᓯᓂᐊᖅᑎᓂᒃ ᐊᒻᒪᓗ ᐃᓄᓐᓂᒃ ᑕᓯᐅᖅᑎᓂᒃ ᐃᓂᒧᑦ .
- ᑲᑎᖅᓱᐃᓗᓂ ᐊᒻᒪᓗ ᖃᐅᔨᓴᕐᓗᓂ ᑐᑭᓯᒋᐊᕈᑎᒃᓴᓂᒃ
- ᑭᓱᓕᒫᓂᒃ ᑐᓴᖅᑎᑦᑎᖃᑦᑕᕐᓗᑎᑦ ᑭᒃᑯᑐᐃᓐᓇᕐᓄᑦ
ᐃᓄᐃᑦ ᖃᐅᔨᒪᔭᑐᖃᖏᑦ ᐃᓚᓕᐅᔾᔭᐅᓯᒪᔭᕆᐊᖃᖅᑐᑦ ᖃᐅᔨᓴᕐᓂᕐᒧᑦ ᖃᐅᔨᔭᐅᔪᓄᑦ, ᐃᓄᓐᓄᑦ, ᖃᐅᔨᒪᑦᑎᐊᖁᓪᓗᒋᑦ ᑐᑭᓯᒋᐊᕈᑎᑦᓴᐃᑦ ᑐᑭᓕᐅᖅᑕᐅᖃᑦᑕᖁᓪᓗᒋᑦ ᑐᑭᖃᑦᑎᐊᖅᑐᒃᑯᑦ ᐃᓄᐃᑦ ᖃᐅᔨᒪᔭᖏᑦ ᓱᓕᓂᕋᖅᑕᐅᓗᑎᒃ. ᑕᐃᒪᐃᒋᐊᖃᕋᑦᑕ ᐊᕐᕌᒎᓐᓂᒃ ᒪᕐᕉᓐᓂᒃ, ᖃᐅᔨᒪᓂᐊᕋᑦᑕ ᖃᓄᐃᓕᖓᓕᕐᒪᖔᑕ ᒫᓐᓇᐅᔪᖅ, ᓴᓇᔪᖃᓚᐅᖅᑎᓐᓇᒍ.
ᐃᑲᔪᖅᑕᐅᓗᑕ ᓄᑖᖑᖅᐸᓪᓕᐊᔪᓄᑦ, ᐆᒃᑑᑎᓕᐅᕈᓐᓇᖅᑐᒍᑦ ᐊᕙᑎᐅᑉ ᑰᒑᓗᖕᒥ ᐊᒻᒪᓗ ᖃᐅᔨᓗᑕ ᖃᓄᐃᓕᒐᔭᕐᒪᖔᑦ ᐃᒪᒃᑯᑦ ᐆᒻᒪᖅᑯᑎᖃᕐᕕᓕᐅᖅᑐᖃᕐᓂᖅᐸᑦ ᑰᖕᒥ. ᑕᐃᒫᒃ ᓇᓚᐅᑦᑖᕈᓐᓇᖅᐳᒍᑦ ᐊᑦᑐᐃᓂᐅᑐᐃᓐᓇᕆᐊᓕᓐᓂᒃ. ᖃᐅᔨᒪᓇᓐᖏᒻᒪᑦ ᑕᒪᓐᓇ ᐱᓕᕆᐊᖑᓚᐅᖅᑎᓐᓇᒍ.
ᐃᓛᓐᓂᒃᑯᑦ, ᑕᑯᔭᐅᓚᐅᕐᒪᑦ ᐃᓐᓇᕕᒃ ᐱᓕᕆᐊᖑᑎᓪᓗᒍ ᐃᓄᒃᔪᐊᒥ, ᐃᒪᒃᑯᑦ ᐆᒻᒪᖅᑯᑎᖃᕐᕕᒃ ᐱᐅᓯᕚᓪᓕᖅᑎᑦᑎᔪᓐᓇᓪᓚᕆᒃᑐᖅ ᐆᒪᔪᐃᑦ ᓇᔪᒐᖏᓐᓂᒃ ᐃᒪᐅᑉ ᑰᓐᓂᖓ ᐊᔾᔨᒌᓕᖅᑎᑕᐅᓗᓂ ᐊᒻᒪᓗ ᐊᓂᖅᓵᖅᑐᕐᓂᖅᓴᐅᓕᕐᓗᓂ ᐃᒪᕐᒥ. ᐃᒻᒪᖃ ᐃᖃᓗᐃᑦ ᐊᒥᓱᕈᕆᐊᑐᐃᓐᓇᕆᐊᓖᑦ.
ᑭᓯᐊᓂᓕ, ᐆᑦᑑᑎᐅᔪᑦ ᑕᑯᒃᓴᐅᑎᑦᑎᑉᐸᑕ ᐱᓕᕆᐊᖑᔪᖅ ᐊᑦᑐᐃᓂᖃᕋᔭᕐᒪᑦ ᖃᓄᖅ ᐃᓄᐃᑦ ᖁᕕᐊᒋᔭᖃᕐᒪᖔᑕ ᓄᓇᒥᒃ, ᐊᖑᓇᓱᓐᓂᕐᒥᒃ, ᐊᒻᒪᓗ ᐊᑐᕐᓂᕐᒥᒃ ᐱᔪᓐᓇᐅᑎᒥᓂᒃ, ᓇᓂᓯᔭᕆᐊᖃᖅᑐᒍᑦ ᖃᓄᖅᑑᕈᑎᒃᓴᓂᒃ ᒥᑭᓪᓕᕚᓪᓕᖁᓪᓗᒋᑦ ᐊᑦᑐᐃᓂᐅᔪᑦ.
ᐊᒻᒪᓗᑦᑕᐅᖅ, ᓄᓇᕗᑦ ᐊᖏᕈᑎᖓ ᐅᖃᖅᓯᒪᔪᖅ ᐱᓕᕆᐊᖅ ᖃᓄᑐᐃᓐᓇᖅ ᐊᓯᔾᔩᒍᑕᐅᒃᐸᑦ ᖃᓄᖅ ᐃᓄᐃᑦ ᐊᑐᖃᑦᑕᕐᓂᖏᓐᓄᑦ ᓄᓇᒥᒃ—ᐊᓪᓛᑦ ᐱᐅᔪᓂᒃ ᐊᓯᔾᔩᒍᑎᓂᒃ—ᐃᖃᓗᖕᒥᐅᑦ ᐸᓐᓂᖅᑑᒥᐅᓪᓗ ᐃᑲᔫᓯᐊᖅᑖᕐᓂᐊᖅᑐᑦ.
ᑕᒪᒃᑯᐊ ᐃᑲᔫᑏᑦ ᑮᓇᐅᔭᑎᒍᑦ, ᐱᖁᑎᕐᔪᐊᑎᒍᑦ, ᐃᓕᖅᑯᓯᓕᕆᓂᕐᒧᑦ ᐱᓕᕆᐊᑎᒍᑦ, ᐃᓕᓐᓂᐊᖅᑎᑦᑎᓂᒃᑯᑦ ᐃᖅᑲᓇᐃᔭᖅᑎᑦᑎᓂᒃᑯᓪᓘᓐᓃᑦ ᐊᓯᖏᑎᒍᓪᓘᓐᓃᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᓄᓇᓕᖕᓂ ᓯᕗᓪᓕᐅᔾᔭᐅᖁᔭᐅᔪᓄᑦ. ᒪᓕᒐᖅᑎᒍᑦ, ᓄᓇᕗᒥ ᐊᖏᕈᑏᑦ ᐱᔭᕆᐊᖃᖅᑎᑦᓯᖕᒪᑕ ᐋᔩᖃᑎᖃᕆᐊᖃᕐᓂᕐᒥᒃ ᐃᑲᔫᓯᐊᒃᓴᓄᑦ ᐊᖏᕈᑎᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᐃᑦ ᑎᒥᖁᑎᖏᓐᓄᑦ—ᕿᑭᖅᑕᓃᒃᑯᑦ. ᓄᓇᕗᒻᒥ ᓄᒃᑭᒃᓴᐅᑎᒃᑯᑦ ᑯᐊᐳᕇᓴᒃᑯᑦ ᓇᒻᒥᓂᖁᑎᒋᔭᐅᓪᓚᕆᑦᑐᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ, ᑖᒃᑯᐊᓗ ᓇᒻᒥᓂᖁᑎᒋᔭᐅᓕᖅᑐᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᑕᒪᓐᓇ ᐊᔾᔨᐅᖏᑦᑑᑎᑕᐅᓪᓗᓂ. ᑕᑯᒋᐊᕈᓐᓇᕐᒥᔪᒍᑦ ᐅᖓᑖᓄᑦ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᔅᓴᖏᓐᓄᓪᓗ ᐊᖏᕈᑏᑦ ᐋᖅᑭᑦᓯᒪᓂᖏᑦ ᐊᑲᐅᓂᖅᐹᒃᑯᑦ ᐊᖑᒻᒪᑎᓗᒋᑦ ᓄᓇᓖᑦ ᐱᔭᕆᐊᓕᖏᑦ.
2025−ᒥ, ᐅᖃᖃᑎᒌᖕᓂᐅᔪᑦ ᐱᒋᐊᖅᓯᒪᕗᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᖃᓄᖅ ᐃᑲᔫᓯᐊᒃᓴᓄᑦ ᐊᖏᖃᑎᒌᒍᑏᑦ ᐋᖅᑭᒃᓯᒪᔪᓐᓇᕐᒪᖔᑕ, ᐊᒻᒪᓗ ᖃᓄᖅ ᐱᓕᕆᖃᑎᖃᕈᓐᓇᕐᒪᖔᑦᑕ ᑐᕋᐃᓐᓇᖅᑐᒥᒃ ᐃᖃᓗᖕᒥᐅᓂᒃ ᐊᒻᒪᓗ ᐸᓐᓂᖅᑑᒥᐅᓂᒃ ᑕᒪᑐᒨᓇ ᐱᓕᕆᔾᔪᓯᒃᑯᑦ. ᑕᐃᒫᒃ ᑭᓯᐊᓂ ᑖᓐᓇ ᐱᓕᕆᐊᖅ ᓯᕗᒧᐊᒍᓐᓇᕐᒪᑦ ᐃᒃᐱᒋᔭᐅᑦᑎᐊᕐᓗᓂ ᓄᓇᕗᒻᒥ ᐊᖏᕈᑏᑦ, ᓄᓇᕗᒻᒥ ᒪᓕᒐᐃᑦ ᓲᕐᓗ ᓄᓇᕗᑦᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ (NIRB), ᐊᒻᒪᓗ ᐃᓄᐃᑦ ᓂᐱᖏᑦ. ᓂᕆᐅᒃᐳᒍᑦ ᓄᓇᓖᑦ ᑐᓴᐅᒪᑎᓐᓂᐊᕆᐊᒃᓴᖏᓐᓂᒃ ᐱᓕᕆᐊᑉ ᐊᒃᑐᐃᓂᕆᑐᐃᓐᓇᕆᐊᖃᖅᑕᖏᓐᓂᒃ ᐃᑲᔫᑎᒃᓴᓂᒡᓗ.
ᓇᐃᓈᖅᓯᒪᔪᖅ ᓄᓇᓕᖕᓂ ᐃᓚᐅᑎᑦᑎᓂᖅ
ᓄᓇᕗᑦ ᓄᒃᑭᒃᓴᐅᑎᖏᑦ ᑯᐊᐳᕇᓴᒃᑯᑦ ᓄᓇᓕᓐᓂᑦ ᐃᓚᐅᑎᑦᑎᓯᒪᒻᒪᑕ ᐱᒋᐊᕐᓂᖓᓂᑦ, ᑭᓯᐊᓂᓕ 2024-ᖑᑎᓪᓗᒍ, ᑖᓐᓇ ᐅᐸᓗᖓᐃᔭᐅᑎ ᐊᖏᖅᑕᐅᓚᐅᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ. ᐊᕐᕌᒎᑉ ᐃᓚᖓᓂ ᓅᑉᐸᓪᓕᐊᔪᖅ ᐃᓄᐃᑦ ᐃᓕᖅᑯᓯᖓᒍᑦ. ᑕᓪᓕᒪᐅᒻᒪᑕ ᑐᕌᒐᓪᓗᐊᑕᐃᑦ ᐊᕐᕌᒍᓕᒫᒥ, ᐊᒻᒪᓗ ᐊᕐᕌᒍᑕᒫᑦ ᐱᒋᐊᒃᑲᓐᓂᖃᑦᑕᖅᑐᑎᒃ ᐱᓕᕆᐊᖅ ᓄᖅᑲᕋᓱᐊᕐᓂᖓᓂ ᐅᕝᕙᓘᓐᓃᑦ ᐱᔭᕇᕋᓱᐊᕐᓂᖓᓂ. ᑰᒑᓗᒃ ᓄᓇᒋᔭᐅᖕᒪᑦ ᐃᖃᓗᖕᒥᐅᓄᑦ ᐸᓐᓂᖅᑑᒥᐅᓄᓪᓗ ᐊᒃᑐᐊᓂᖃᖅᖢᑎᒃ, ᑕᒪᕐᒥᒃ ᐱᓕᕆᖃᑎᒌᖕᓂᐅᔪᑦ ᐱᒋᐊᕐᓗᒍ 2025 ᐃᓚᖃᖅᐳᖅ ᑕᒪᒃᑮᖕᓂᒃ ᓄᓇᓕᖕᓂᒃ.
ᑕᒪᕐᒥᒃ ᐱᒋᐊᓲᖑᕗᑦ ᐅᐱᕐᖔᖑᓕᖅᑎᓪᓗᒍ—ᓄᓇᕗᒻᒥ ᓄᑭᒃᓴᐅᑏᑦ ᑯᐊᐳᕇᓴᒃᑯᑦ ᑲᑎᖃᑎᖃᖃᑦᑕᖅᐳᑦ ᓇᖕᒥᓂᖅ ᐊᒪᕈᕐᒥ ᐊᒻᒪ ᐸᖕᓂᖅᑑᒥ ᐊᖑᓇᓱᒃᑐᓕᕆᔩᑦ ᑲᑎᒪᔨᖏᑦ (HTAs) ᐸᕐᓇᒃᐸᓪᓕᐊᓪᓗᑎᒃ ᐊᐅᔭᒃᑯᑦ ᐊᓪᓚᖃᑦᑕᕐᓂᐊᕐᓂᕐᒥᓂᒃ ᑰᒑᓗᖕᒥ. ᒫᓐᓇᐅᔪᖅ, ᑕᒪᓐᓇ ᑐᑭᖃᖅᐳᖅ ᐋᖅᑭᒃᓱᐃᖃᑎᒌᓐᓂᕐᒥᒃ ᖃᐅᔨᓴᕐᓂᕐᒧᑦ ᐸᕐᓇᐅᑎᓂᒃ ᓄᐊᑦᑎᓂᕐᒧᑦ ᑐᑭᓯᒋᐊᕈᑎᒃᓴᓂᒃ.
ᐅᐱᕐᖔᒃᑯᑦ, ᑐᓴᖅᑎᑦᓯᕙᑦᑐᒍᑦ ᓄᓇᒧᑦ ᐸᕐᓇᐅᑎᓂᒃ ᐃᓄᓐᓄᑦ, ᐊᒻᒪᓗ ᐃᖅᑲᓇᐃᔭᖅᑎᑖᖅᐸᓪᓕᐊᓕᖅᑐᑕ ᓄᓇᓕᒻᒥᐅᓂᒃ ᑰᒑᓗᒻᒨᕈᒪᔪᓂᒃ ᐃᑲᔪᕆᐊᖅᑐᕐᓗᑎᒃ ᖃᐅᔨᓴᕐᓂᐅᔪᓂᒃ.
ᑐᓴᒐᒃᓴᐃᑦ ᑐᓴᖅᑕᐅᑎᑕᐅᖃᑦᑕᖅᑐᑦ ᑰᒑᓗᖕᒥᑦ ᐊᐅᔭᓕᒫᖅ ᓄᓇᕘᒥ ᐆᒪᔪᕐᓂᐊᖅᑎᒃᑯᑦ ᖃᕆᑕᐅᔭᒃᑯᑦ ᑐᓴᐅᒪᖃᑦᑕᐅᑎᔾᔪᑎᖏᑎᒍᑦ, ᐱᓇᓱᐊᕈᓯᑕᒫᑦ ᖃᕆᑕᐅᔭᒃᑯᑦ ᑎᑎᕋᖃᑦᑕᖅᖢᑎᒃ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐊᒻᒪᓗ ᑭᒃᑯᑐᐃᓐᓇᕐᓄᑦ ᑕᖅᑭᑦ ᐱᖓᓱᑦ ᐊᓂᒍᕌᖓᑕ ᑐᓴᒐᒃᓴᑎᒍᑦ.
ᐅᑭᐊᒃᓵᒃᑯᑦ, ᑭᒃᑯᑐᐃᓐᓇᕐᓄᑦ ᖃᓄᐃᓕᐅᖅᑎᑦᑎᖃᑦᑕᕆᐊᖃᓕᕋᑦᑕ ᐃᖃᓗᖕᓂ ᐊᒻᒪᓗ ᐸᓐᓂᖅᑑᒥ, ᑕᐃᒃᑯᐊ ᓴᖅᑭᑕᐅᓯᒪᔪᑦ ᐊᐅᔭᒃᑯᑦ ᑲᑐᔾᔭᐅᖃᑦᑕᕐᒪᑕ. ᕿᒥᕐᕈᐊᕐᓂᐊᖅᑕᕗᑦ ᑎᑎᕋᖅᓯᒪᔪᑦ ᐊᑕᐅᑦᑎᒃᑯᑦ, ᐊᒻᒪᓗ ᑐᑭᖃᑦᑎᐊᓕᖅᑎᓪᓗᒋᑦ ᐊᑐᕐᓗᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᓪᓗᓈᑦ ᑭᓪᓕᓯᓂᐊᖅᑎᖏᑦ ᐊᑐᕐᓗᒋᑦ.
ᑭᖑᓪᓕᖅᐹᒥ, ᐅᑭᐅᒃᑯᑦ, ᑐᙵᓱᒃᑎᑦᑎᒃᑲᓐᓂᕐᓂᐊᖅᑐᒍᑦ ᑭᒃᑯᑐᐃᓐᓇᕐᓄᑦ ᖃᓄᐃᓕᐅᕐᓂᐅᔪᓂᒃ ᑐᕌᖓᔪᓂᒃ ᐃᓕᓐᓂᐊᕐᓂᕐᒧᑦ ᐊᒻᒪᓗ/ᐅᕝᕙᓘᓐᓃᑦ ᐊᖏᖅᑕᐅᓇᓱᐊᕐᓂᕐᒧᑦ. ᐃᓕᑉᐹᓪᓕᕈᑎᒃᓴᖅᑕᖃᕈᓘᔭᖅᑐᖅ ᐃᒪᒃᑯᑦ ᐆᒻᒪᖅᑯᑎᓕᕆᓂᐅᑉ ᒥᒃᓵᓄᑦ, ᖃᓄᖅ ᐊᐅᓚᓂᖃᖅᓯᒪᖕᒪᖔᑦ ᐊᓯᖏᓐᓂᑦ ᐃᓄᐃᑦ ᓄᓇᖓᓐᓂᑦ, ᐊᒻᒪᓗ ᐱᓕᕆᐊᑉ ᐱᕙᓪᓕᐊᓂᖓᑕ ᐱᕙᓪᓕᐊᓂᖓ. ᑐᓴᕈᒪᔪᒍᑦ ᐃᖃᓗᖕᒥᐅᓂᒃ ᐊᒻᒪᓗ ᐸᓐᓂᖅᑑᒥᐅᓂᒃ ᑭᓱᓂᒃ ᖃᐅᔨᔪᒪᖕᒪᖔᑕ, ᑭᓱᓂᒃ ᐱᐅᒃᓴᕐᒪᖔᑕ, ᐊᒻᒪᓗ ᑭᓱᓂᒃ ᐃᓱᒫᓘᑎᖃᕐᒪᖔᑕ. ᐃᓱᒪᓕᐅᕆᐊᖃᓕᕈᑦᑕ (ᐊᖏᖅᑕᐅᔭᕆᐊᖃᓕᕈᑦᑕ ᐱᔪᓐᓇᐅᑎᖃᖅᑐᓄᑦ ᓯᕗᒧᐊᒃᐸᓪᓕᐊᖁᓪᓗᑕ ᐱᕙᓪᓕᐊᑎᑦᑎᓂᕐᒧᑦ), ᓄᓇᓕᐅᔪᓂᒃ ᑕᑯᓐᓇᕐᓂᐊᖅᑐᒍᑦ ᑐᑭᒧᐊᒍᑎᒃᓴᓂᒃ.
ᑖᓐᓇ ᐃᓚᐅᑎᑦᑎᓂᕐᒧᑦ ᐸᕐᓇᐅᑎ ᓄᓇᓕᒻᒥᐅᓂᒃ ᐱᔪᓐᓇᐅᑎᖃᖅᑐᓂᓪᓗ ᑐᓴᐅᒪᑎᑦᑎᕙᑉᐳᖅ ᖃᓄᓕᒫᖅ. ᐅᖃᖃᑎᒌᒃᑲᓐᓂᕆᐊᖃᓕᕌᖓᑕ ᐅᕝᕙᓘᓐᓃᑦ ᐊᓯᔾᔨᕆᐊᖃᓕᕌᖓᑕ, ᖃᓄᐃᓕᐅᖅᑎᑦᑎᒃᑲᓐᓂᖃᑦᑕᖅᑐᒍᑦ ᑲᑎᒪᓂᐅᔪᓂᒡᓗ, ᑭᒃᑯᓕᒫᑦ ᓂᐱᖏᑦ ᑐᓴᖅᑕᐅᔪᓐᓇᖁᓪᓗᒋᑦ. ᑭᓇᑐᐃᓐᓇᖅ ᖃᐅᔨᒋᐊᕈᓐᓇᖅᑐᖅ ᓄᓇᕗᒻᒥ ᓄᑭᒃᓴᐅᑎᓄᑦ ᑯᐊᐳᕇᓴᒃᑯᓐᓄᑦ ᖃᖓᑐᐃᓐᓇᒃᑯᑦ ᐊᐱᖅᓱᕈᒪᒍᓂ, ᐃᓱᒪᒃᓴᖅᓯᐅᕈᑎᖃᕈᒪᒍᓂ, ᐅᕝᕙᓘᓐᓃᑦ ᑐᓴᖅᑎᑦᑎᔪᒪᒍᓂ.
ᑐᓴᕈᒪᑦᑎᐊᖅᐳᒍᑦ ᐃᓕᔅᓯᓐᓂᒃ!
ᖃᖓᐅᓂᖓ
IAC ᐃᓄᐃᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ
ᑖᒃᑯᐊ 9-ᖑᔪᑦ ᐃᓄᐃᑦ ᐃᖃᓗᓐᓂᑦ ᐸᓐᓂᖅᑑᒥᐅᓪᓗ ᐱᓕᕆᖃᑎᒌᓐᓂᐊᖅᑐᑦ ᑐᑭᒧᐊᑦᑎᑦᓯᓗᑎᒃ ᐃᓚᓕᐅᔾᔨᓂᕐᒥᒃ ᐊᒻᒪᓗ ᐊᖏᖃᑎᒌᓐᓂᕐᒥᒃ ᕿᓂᕐᓂᕐᒧᑦ ᐊᑐᖅᑕᐅᕙᑦᑐᓂᒃ, ᐊᒻᒪᓗ ᐊᖏᓪᓕᒋᐊᕐᓗᒋᑦ ᐃᓄᐃᑦ ᐃᓱᒪᒋᔭᖏᑦ ᐱᓕᕆᐊᒧᑦ ᐃᓘᓐᓈᒍᑦ. ᐅᓇ ᐱᓕᕆᐊᖑᔪᖅ ᑐᕌᒐᖃᕋᓗᐊᖅᑎᓪᓗᒍ ᐃᒥᕐᒥᒃ ᐆᒻᒪᖅᑯᑎᖃᖅᑎᑦᑎᓂᕐᒥᒃ ᐃᖃᓗᖕᓄᑦ, ᑭᒡᒐᖅᑐᖅᑎᖃᕈᒪᕗᒍᑦ ᐸᓐᓂᖅᑑᒥᙶᕐᒥᔪᑦᑕᐅᖅ, ᑖᒃᑯᐊᑦᑕᐅᖅ ᐊᒃᑐᐊᓯᒪᖕᒪᑕ ᓄᓇᒧᑦ ᐊᒻᒪ ᑰᖕᒧᑦ ᑰᒑᓗᖕᒥ.
ᐃᖃᓗᖕᓂᑦ, ᒪᕐᕉᒃ ᒪᒃᑯᒃᑑᒃ, ᒪᕐᕉᒃ ᐃᓐᓇᑐᖃᐅᔫᒃ, ᒪᕐᕉᒃ ᐊᖏᔫᑎᓄᑦ ᑭᒡᒐᖅᑐᐃᔩᑦ, ᐊᒻᒪᓗ ᑲᑎᒪᔨᐅᔪᖅ ᐊᒪᕈᕐᒥ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᓐᓄᑦ. ᐸᓐᓂᖅᑑᒥᑦ, ᑲᑎᒪᔨᑕᖃᖅᑐᖅ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᓐᓂᑦ, ᐊᒻᒪᓗ ᐊᑕᐅᓯᖅ ᑭᒡᒐᖅᑐᖅᑎᒻᒪᕆᒃ. ᐃᓄᐃᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᑲᑎᒪᖃᑦᑕᖅᑐᑦ ᓯᑕᒪᐃᕋᖅᑐᑎᒃ ᐊᕐᕌᒍᒥ ᐃᑲᔪᖅᑐᑎᒃ ᐅᐸᓗᖓᐃᔭᐃᓂᕐᒥᒃ ᐃᓚᐅᑎᑦᑎᓂᕐᒧᑦ ᖃᓄᐃᓕᐅᕐᓂᐅᓂᐊᖅᑐᓂᒃ ᐊᒻᒪᓗ ᕿᒥᕐᕈᓪᓗᑎᒃ ᐃᓕᑉᐸᓪᓕᐊᔭᒥᓂᒃ. ᒪᓕᒐᓕᐅᖅᑎᓕᒫᑦ ᐊᑭᓕᖅᑕᐅᕙᑉᐳᑦ ᐱᕕᖃᕐᓂᖏᓐᓄᑦ $250-ᓂᒃ ᑲᑎᒪᓂᑕᒫᑦ, ᖄᒃᑲᓐᓂᐊᒍᑦ ᑲᑎᒪᔾᔪᓯᐊᖅᑖᖅᑎᑕᐅᕙᑦᑐᑎᒃ ᐱᕕᖃᕐᓂᖏᓐᓄᑦ ᖃᕋᓴᐅᔭᒃᑯᑦ ᑎᑎᕋᖃᑦᑕᕐᓂᖏᓐᓄᑦ, ᑐᓴᒐᒃᓴᓕᕆᔨᓄᑦ ᑐᓴᐅᒪᖃᑦᑕᐅᑎᓂᖏᓐᓄᑦ, ᐊᒻᒪᓗ ᐊᕐᕌᒍᑕᒫᑦ ᐱᔭᕇᖅᓯᒍᑎᒃ ᖁᔭᓐᓇᒦᕈᓯᐊᖅᑖᖅᑎᑕᐅᕙᑦᑐᑎᒃ. ᑕᒪᓐᓇ ᓈᒻᒪᖁᓪᓗᒍ, ᒪᓕᒐᓕᐅᖅᑏᑦ ᓂᕈᐊᖅᑕᐅᕙᑉᐳᑦ ᓯᓚᑖᓃᑦᑐᓄᑦ ᓄᑖᙳᕆᐊᖅᑎᑦᑎᔪᓐᓇᖅᑐᑎᓪᓗ ᐃᓂᒋᔭᒥᓂᒃ ᐊᕐᕌᒍᑕᒫᑦ ᐊᕐᕌᒍᓄᑦ ᐱᖓᓱᓄᑦ.
ᓇᓃᓐᓂᙵᑦᑕ ᐱᒋᐊᖅᕕᖓ ᐱᕙᓪᓕᐊᖤᖅ
ᑖᓐᓇ ᑎᑎᖅᑐᒐᖅ ᑕᑯᒃᓴᐅᑎᑦᑎᔪᖅ ᖃᓄᖅ ᐱᓕᕆᐊᖅ ᐱᕙᓪᓕᐊᑎᑕᐅᕙᒻᒪᖔᖅ ᐱᒋᐊᕐᓂᖓᓂᑦ ᐃᓱᐊᓄᑦ. ᑕᐃᔭᐅᔪᖅ ᓇᓪᓕᑭᑕᕐᓂᒃᑯᑦ ᐊᖅᑯᑎᐅᔪᖅ ᐱᔾᔪᑎᒋᓪᓗᒍ ᐊᕕᒃᑐᕐᓯᒪᒻᒪᑦ ᐱᓕᕆᐊᖑᔪᖅ 6-ᓄᑦ ᓇᓪᓕᑭᑕᕐᓂᐅᔪᓄᑦ ᐃᓱᒪᓕᐅᕈᑎᖃᖅᑐᑎᒃ ᐊᑯᕐᖓᓐᓂ ᐊᑐᓂ ᓇᓪᓕᑭᑕᕐᓂᐅᔪᑦ. ᑎᒥᐅᔪᖅ ᐱᓕᕆᐊᖑᔪᖅ, ᓇᓗᓇᐃᖅᑕᐅᓯᒪᔪᖅ ᑐᕌᒐᕆᔭᐅᔪᒧᑦ. ᐃᓱᒪᓕᐅᕈᑕᐅᔪᓐᓇᖅᑐᖅ ᑕᑯᓐᓇᖃᑦᑕᕋᑦᑕ ᐃᓄᐃᑦ ᓯᕗᓕᖅᑎᖏᓐᓂᒃ ᐊᒻᒪᓗ ᑭᒃᑯᑐᐃᓐᓇᕐᓂᒃ ᐊᖏᕈᑎᖃᖁᓪᓗᒋᑦ ᓯᕗᒧᐊᒃᐸᓪᓕᐊᓂᕐᒧᑦ. ᓄᓇᕗᑦ ᓄᑭᒃᓴᐅᑎᒃᑯᑦ ᑯᐊᐳᕇᓴᒃᑯᑦ ᒪᓕᖃᑦᑕᖅᑐᑦ ᑖᔅᓱᒥᖓ ᐱᓕᕆᔾᔪᓯᕐᒥᒃ ᓄᓇᓕᓕᒫᓄᑦ ᐱᓕᕆᐊᖑᔪᓄᑦ, ᐊᒻᒪᓗ ᕿᓃᓐᓇᖅᑐᑎᒃ ᖃᓄᖅ ᐱᐅᓯᕚᓪᓕᕈᓐᓇᕐᒪᖔᑦ.
ᓄᓇᕗᑦ ᓄᑭᒃᓴᐅᑏᑦ ᑯᐊᐳᕇᓴᒃᑯᑦ ᐱᓕᕆᖃᑎᖃᖅᐸᑉᐳᑦ ᐱᓕᕆᐊᒧᑦ ᐱᓕᕆᖃᑎᒌᓂᑦ ᐱᔭᕇᖅᓯᓇᓱᐊᖅᑐᑎᒃ ᐃᓚᖓᓐᓂᑦ. ᑕᐃᒪᓕ, ᑕᑯᒃᓴᐅᑎᑦᑎᕙᒃᐳᒍᑦ ᐱᓕᕆᐊᖑᔪᒥᒃ ᓄᓇᓕᐅᔪᓄᑦ. ᑕᕝᕘᓇ ᐃᓱᒪᓕᐅᕈᑎᒃᑯᑦ ᓅᓐᓂᐊᕈᑦᑕ ᐊᒻᒪᓗ ᑭᖑᓪᓕᕐᒧᑦ ᓅᓐᓂᐊᕐᓗᑕ, ᖃᐅᔨᒋᐊᕆᐊᖃᕋᑦᑕ ᐃᓄᐃᑦ ᓈᒻᒪᒃᓴᕐᒪᖔᑕ ᐱᕙᓪᓕᐊᓂᕐᒥᒃ ᐊᒻᒪᓗ ᑲᔪᓯᖁᔨᒻᒪᖔᑕ. ᐱᖓᓲᒻᒪᑕ ᑭᐅᔾᔪᑎᐅᔪᓐᓇᖅᑐᑦ ᐃᓄᓐᓂᑦ ᐃᓱᒪᓕᐅᕈᑎᖃᓕᖅᑎᓪᓗᑕ:
- ᐋᒡᒐ, ᑕᒪᓐᓇ ᐱᔪᒪᙱᑕᕗᑦ—ᓄᖅᑲᖅᑎᑕᐅᓗᓂ ᐃᖅᑲᓇᐃᔭᕐᓂᖅ.
- ᑲᔪᓯᖁᕙᒋᑦ, ᑭᓯᐊᓂ ᖁᕕᐊᒋᙱᑕᕗᑦ ᑕᒪᓐᓇ ᓴᖅᑭᑦᑐᖅ—ᐆᒃᑐᒃᑲᓐᓂᕆᑦ.
- ᐄ, ᑕᒪᓐᓇ ᐱᐅᒋᕙᕗᑦ—ᑲᔪᓯᓗᑎᑦ.
ᑐᕌᒐᕆᔭᕗᑦ ᓇᓂᓯᓇᓱᐊᕐᓂᖅ ᖃᓄᖅ ᐊᖏᖃᑎᒌᒍᓐᓇᕐᒪᖔᑦᑕ, ᒪᓕᒃᑐᒋᑦ ᐃᓄᐃᑦ ᐱᒻᒪᕆᐅᒋᔭᖏᑦ. ᑕᒪᓐᓇ ᑐᑭᖃᖅᐳᖅ ᐃᓂᒃᓴᖃᖅᑎᑦᑎᓂᕐᒥᒃ ᑕᒪᐃᓐᓄᑦ ᐃᓱᒪᒋᔭᐅᔪᓄᑦ, ᓇᓂᓯᓂᕐᒥᒃ ᖃᓄᖅᑑᕈᑎᒃᓴᓂᒃ ᐋᖅᑭᒃᓱᐃᓂᕐᒥᒃ ᐸᕐᓇᐅᑎᓂᒃ, ᐊᒻᒪ ᑲᒪᒋᔭᖃᕐᓂᕐᒥᒃ ᐃᓱᒫᓘᑕᐅᔪᓂᒃ. ᑕᐃᒪᐃᒐᔪᒃᑐᖅ ᐊᒻᒪᓗ ᖃᓄᐃᓐᖏᑦᑐᖅ ᐃᓄᐃᑦ ᐊᖏᖃᑎᖃᓐᖏᑉᐸᑕ. ᐱᒻᒪᕆᐅᕗᖅ ᓈᓚᖃᑦᑕᕆᐊᖃᕋᑦᑕ (ᑐᑭᓯᐅᒪᓗᑕ), ᓴᖅᑭᔮᑦᑎᐊᖅᑐᓂᒃ ᑐᑭᓯᒋᐊᕈᑎᒃᓴᓂᒃ ᑐᓂᓯᖃᑦᑕᕐᓗᑕ, ᑭᐅᖃᑦᑕᕐᓗᑕ ᐊᐱᖅᑯᑎᓂᒃ, ᓱᓕᑦᑎᐊᕐᓗᑕ ᖃᐅᔨᒪᓐᖏᒐᐃᒐᑦᑕ ᑭᓱᑐᐃᓐᓇᕐᒥᒃ, ᐊᒻᒪᓗ ᐸᕐᓇᐅᑎᓕᐅᖃᑦᑕᕐᓗᑕ ᖃᐅᔨᒋᐊᒃᑲᓐᓂᕈᑎᒃᓴᓂᒃ. ᑕᐃᒪᓐᓇ ᐅᖃᖃᑎᒌᖕᓂᒃᑯᑦ ᓇᓂᓯᔪᓐᓇᖃᑦᑕᕋᑦᑕ ᐋᖅᑭᒍᑎᒃᓴᓂᒃ ᓯᕗᒧᐊᒍᑎᒃᓴᓂᒡᓗ.
ᑕᐃᒪᐃᒃᑲᓗᐊᖅᑎᓪᓗᒍ, ᐊᖏᖅᑐᐃᓐᓇᐅᔾᔮᖅᑰᓐᖏᑦᑐᑦ. ᕿᓂᖅᑕᕗᑦ ᐊᒥᓲᓂᖅᓴᐃᑦ ᐃᓄᐃᑦ ᐊᖏᖃᑎᖃᖅᑐᑦ ᐊᑕᐅᓯᕐᒥᑦ ᑭᐅᔾᔪᑎᒥᑦ—ᑖᓐᓇ ᑕᖅᑲᒃᑯᓇᙵᑦ ᑐᓴᖅᑕᐅᔪᑦ ᑎᒍᕙᑦᑕᕗᑦ ᑐᓂᓪᓗᑎᒍᓗ ᐃᓄᐃᑦ ᓯᕗᓕᖅᑎᖏᓐᓄᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓂ, ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐃᑲᔪᖅᑕᐅᖁᓪᓗᒋᑦ ᑭᖑᓪᓕᖅᐹᒥ ᐃᓱᒪᓕᐅᕈᑎᖃᖅᑎᓪᓗᒋᑦ.
ᐊᒡᒍᖅᑐᐃᓂᖅ ᐃᓕᖅᑯᓯᐅᔪᒥᒃ ᐊᐅᓚᑕᐅᔪᓐᓇᖅᑐᓄᑦ ᑕᐃᒫᒃ ᐱᕕᖃᖅᑎᑦᑎᒻᒪᑦ ᐃᓄᓐᓂᒃ ᐃᓱᒪᓕᐅᕈᓐᓇᕐᓗᑎᒃ ᑮᓇᐅᔭᖃᖅᑎᑦᑎᓂᖅ ᑲᔪᓯᔭᕆᐊᖃᕐᒪᖔᖅ ᑕᐃᒫᒃ ᑐᒃᓯᕋᐅᑕᐅᓯᒪᓂᖓ ᒪᓕᓪᓗᒍ. ᑖᓐᓇ ᓴᓇᔭᐅᓐᓂᖅᐸᑦ ᐃᓄᐃᑦ ᑎᓴᒪᐃᕋᖅᑐᑎᒃ ᐊᖏᖃᑦᑕᕐᒪᑕ ᐊᖅᑯᑎᓕᒫᒥ. ᑕᒪᓐᓇ ᑐᓐᖓᕕᒋᔭᐅᔪᖅ ᖃᓄᖅ ᐊᑐᖃᑦᑕᕐᒪᖔᑦᑕ ᐃᓱᒪᒋᔭᐅᔪᒥᒃ ᐊᑭᖃᓐᖏᑦᑐᒥᒃ, ᓯᕗᕐᖓᒍᑦ ᑐᓴᐅᒪᑎᑕᐅᑦᑎᐊᕐᓗᑎᒃ ᐊᖏᕐᓂᕐᒥᒃ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ ᓄᑦᑎᖅᐸᓪᓕᐊᓂᕐᒧᑦ ᕿᑭᖅᑕᓂ ᐊᕕᑦᑐᖅᓯᒪᔪᓂ.
1. ᓇᓗᓇᐃᖅᓯᓗᓂ ᐱᕕᒃᓴᐅᔪᒥᒃ
ᓯᕗᓪᓕᖅᐹᒥ, ᖃᐅᔨᒋᐊᖅᐸᑉᐳᒍᑦ ᐊᔪᕐᓇᙱᒻᒪᖔᖅ ᐋᖅᑭᔅᓱᐃᒋᐊᖓ ᐆᒻᒪᖅᑯᑎᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᓄᓇᓕᓐᓄᑦ. ᑕᒪᓐᓇ ᑐᑭᖃᖅᐳᖅ ᕿᒥᕐᕈᓇᒋᐊᖃᕐᓂᕐᒥᑦ ᐱᑕᖃᖅᐸᒌᖅᑐᓂᑦ ᑎᑎᕋᖅᓯᒪᔪᓂᑦ ᐊᑐᐃᓐᓇᖃᕐᕕᒋᓯᒪᔭᑦᑎᓐᓂᑦ ᒐᕙᒪᒃᑯᓐᓂᑦ, ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᐊᓯᖏᓐᓄᓪᓗ ᑎᒥᐅᔪᓄᑦ ᐃᓚᐅᖃᑕᐅᕙᑦᑐᓄᑦ ᑐᑭᓯᐅᒪᓂᕐᒥᑦ ᓄᓇᓕᓐᓂᑦ ᓄᓇᒥᐅᑕᓂᑦ.
ᑕᖅᑭᒐᓴᓐᓂᒃ ᐱᓕᕆᐊᖑᒐᔪᒃᐳᖅ.
ᐃᓱᒪᓕᐅᕈᑎ
ᑕᕝᕙᙵᑦ ᖃᐅᔨᓴᕐᓂᐅᓚᐅᖅᑐᒥᒃ, ᓴᖅᑭᑦᑎᕙᒃᐳᒍᑦ ᐃᓱᒪᓕᐅᕈᑎᓄᑦ ᐃᑲᔪᖅᓱᐃᔾᔪᑎᓂᒃ ᐃᓄᐃᑦ ᓯᕗᓕᖅᑎᐅᓂᖏᓐᓄᑦ.
ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖏᑦ ᑖᔅᓱᒥᖓ ᐊᑐᖅᑐᑦ ᑭᐅᔾᔪᑎᒋᓪᓗᒍ ᐊᐱᖅᑯᑎᒧᑦ: ᓄᓇᕗᒻᒥ ᓄᒃᑭᒃᓴᐅᑏᑦ ᑯᐊᐳᕇᒪᒃᑯᑦ ᓯᕗᒧᐊᒋᐊᖃᖅᐹᑦ ᓇᓂᓯᓂᕐᒥᑦ ᐃᓘᓐᓇᖏᓐᓂᑦ ᓇᓖᕌᕋᔅᓴᓂᑦ ᐊᑐᒃᑲᓐᓂᕈᓐᓇᖅᑐᓂᑦ ᐆᒻᒪᖅᑯᑎᓂᑦ ᐱᕙᓪᓕᐊᑎᑦᓯᓂᕐᒥᑦ?
ᐄᖑᑉᐸᑦ, ᐅᑎᖅᑎᑦᑎᕙᑉᐳᑦ ᐊᑎᓕᐅᖅᓯᒪᔪᒥᒃ ᐊᔾᔨᖓᓂᒃ ᐊᖏᖅᑕᐅᓯᒪᓪᓗᑎᒃ ᑎᓕᔭᐅᓯᒪᓪᓗᑎᓪᓗ ᕿᒥᕐᕈᓇᒃᑲᓐᓂᖁᓪᓗᒋᑦ ᐱᕕᒃᓴᐅᔪᓂᒃ.
ᐃᑲᔫᑎᒃᓴᑦ
- Resource link 1
- Resource link 2
- Resource link 3
- Resource link 4
2. ᑲᔪᓯᑦᑎᐊᕈᓐᓇᕐᒪᖔᑦ
ᑭᖑᓪᓕᕐᒥ, ᓴᖅᑭᑦᑎᕙᒃᐳᒍᑦ ᐊᒥᓱᓂᒃ ᓇᓖᕌᕈᑎᒃᓴᓂᒃ, ᓄᑖᖑᖅᐸᓪᓕᐊᔪᓄᑦ ᖃᓄᐃᑦᑑᓂᖏᓐᓄᑦ ᐊᒻᒪ ᓇᒦᓐᓂᖏᓐᓄᑦ. ᓄᓇ, ᐃᒪᖅ, ᐊᓄᕆ, ᓯᕿᓂᕐᓗ ᓄᓇᓕᓕᒫᑦ ᖃᓂᒋᔮᓂ ᐊᔾᔨᐅᙱᒻᒪᑕ.
ᐃᓱᒪᒃᓴᖅᓯᐅᕈᑎᖃᑦᑎᐊᕆᐊᖃᕋᑦᑕ ᖃᓄᖅ ᐊᖏᓂᖅᐹᒃᑯᑦ ᐆᒻᒪᖅᑯᑎᖃᕈᓐᓇᕐᒪᖔᑦᑕ ᐊᒻᒪᓗ/ᐅᕝᕙᓘᓐᓃᑦ ᐆᒻᒪᖅᑯᑎᓕᐅᕈᓐᓇᕐᒪᖔᑦᑕ ᓄᑖᕈᕆᐊᖅᑕᐅᔪᓐᓇᖅᑐᓂᒃ ᐊᑐᕈᓐᓇᖅᑕᑦᑎᓐᓂᒃ. ᐃᓚᖏᓐᓂᑦ, ᑕᒪᓐᓇ ᑐᑭᖃᕈᓐᓇᖅᐳᖅ ᑲᑎᑎᕆᓂᕐᒥᑦ ᐊᒥᓱᓂᑦ ᑐᑭᓯᒋᐊᕐᕕᐅᔪᓂᑦ. ᐃᒪᐃᒐᔪᒃᑐᖅ, NNC-ᑯᑦ ᐋᖅᑭᒃᓯᖃᑦᑕᕐᒪᑕ ᓯᓚᓕᕆᓂᕐᒧᑦ ᖃᐅᔨᓴᕈᑎᒥᒃ, ᖁᓛᓂ ᖃᐅᔨᓴᕈᑎᖃᖅᑐᑎᒃ ᐊᓄᕆᒥᒃ ᓯᕿᓂᕐᒥᓪᓗ.
ᑕᒪᓐᓇ ᐊᕐᕌᒍᓕᒫᐸᓗᒃ ᐱᓕᕆᐊᖑᓲᖑᕗᖅ.
ᐃᓱᒪᓕᐅᕈᑎ
ᑕᒪᕐᒥᒃ ᓇᓖᕌᕈᑎᒃᓴᑦ ᓴᖅᑭᑕᐅᕙᒃᑐᑦ ᑭᒃᑯᑐᐃᓐᓇᕐᓄᑦ ᐊᒻᒪᓗ ᐱᔪᓐᓇᐅᑎᖃᖅᑐᓄᑦ ᐃᓱᒪᒃᓴᖅᓯᐅᕈᑕᐅᓂᐊᕐᒪᑕ. ᐊᒃᓱᕈᑦᑎᐊᕋᓱᐊᖃᑦᑕᖅᑐᑦ ᑐᓴᐅᒪᑎᑦᑎᓇᓱᐊᖅᑐᑎᒃ ᐱᒻᒪᕆᐅᔪᓂᒃ ᓇᓗᓇᐃᔭᖅᓯᒪᔪᓂᒃ, ᐱᐅᓂᖏᓐᓂᒃ, ᐊᒻᒪᓗ ᐱᐅᓐᖏᓐᓂᖏᓐᓂᒃ ᑕᒪᐃᓐᓂᒃ ᓇᓖᕌᕈᑎᒃᓴᓂᒃ ᐊᔾᔨᒌᓐᖏᑦᑐᒃᑯᑦ: ᐅᓂᒃᑳᖅᑐᐊᖃᕐᓂᒃᑯᑦ, ᐅᓂᒃᑳᓕᐅᕐᓂᒃᑯᑦ, ᐊᑕᐅᓯᕐᒧᑦ ᐅᖃᖃᑎᒌᖕᓂᒃᑯᑦ, ᐊᕙᓗᒥᐅᑕᓂᒃ, ᐅᖃᓕᒫᒐᕋᓛᓂᒃ, ᐊᒻᒪᓗ ᑲᑎᙵᔪᓂᒃ ᐊᐱᖅᓱᕐᓂᒃᑯᑦ ᑭᐅᓂᒃᑯᑦ. ᑭᒃᑯᓕᒫᑦ ᐅᐸᒍᑎᔪᑦ ᓂᕈᐊᖃᑦᑕᖅᑐᑦ ᖁᑦᑎᓂᖅᐹᓂᒃ ᐱᖓᓱᓂᒃ ᓇᓖᕌᕈᑎᒃᓴᓂᒃ (ᐃᓘᓐᓇᑎᒃ ᓇᓖᕌᕈᑎᒃᓴᑦ ᑎᑎᕋᖅᑕᐅᓯᒪᔪᑦ ᓂᕈᐊᕈᑎᒥ, ᐱᖃᓯᐅᑎᓪᓗᒍ ᓇᓖᕌᕈᑎᒃᓴᖅ ᑲᔪᓯᑎᑦᑎᓂᕐᒥᒃ ᐅᖅᓱᐊᓗᖕᒥᒃ).
ᐃᓚᐅᖃᑕᐅᔪᑦ ᓂᕈᐊᕈᑎᒥᓂᒃ ᐊᖏᕐᕋᐅᔾᔨᔪᓐᓇᖅᑐᑦ ᑎᑎᖅᑲᓂᐊᕐᕕᒃᑯᓪᓗ ᑐᔪᐃᓗᑎᒃ ᐱᓇᓱᐊᕈᓰᒃ ᒪᕐᕉᒃ ᐊᓂᒍᖅᐸᑎᒃ—ᐱᒻᒪᕆᐅᕗᖅ ᐱᕕᖃᖅᑎᑕᐅᓗᓂ ᑐᑭᓯᒋᐊᕈᑎᓂᒃ ᐃᓱᒪᒃᓴᖅᓯᐅᕈᑎᖃᕐᓗᓂᓗ. ᑖᒃᑯᓇᓐᖓᑦ ᓂᕈᐊᕈᑎᓂᒃ, ᓄᓇᕗᑦ ᓄᑭᒃᓴᐅᑎᒃᑯᑦ ᑯᐊᐳᕇᓴᖓᑦ ᕿᓂᖅᑐᑦ ᓴᓐᖏᔪᒥᒃ ᐊᒥᓲᓂᖅᓴᓂᒃ ᓂᕈᐊᕈᒪᓪᓗᑎᒃ ᐱᐅᒋᓂᖅᐹᒥᓂᒃ ᐱᓕᕆᐊᒃᓴᒥᒃ ᐱᕙᓪᓕᐊᑎᑦᑎᓂᕐᒧᑦ.
ᐃᑲᔫᑎᒃᓴᑦ
- Resource link 1
- Resource link 2
- Resource link 3
- Resource link 4
3. ᓴᓇᔪᓕᕆᔨᒻᒪᕆᓕᕆᓂᖅ + ᐊᒃᑐᐃᓂᐅᔪᑦ ᐊᒻᒪ ᐃᑲᔫᑎᒃᓴᑦ ᖃᐅᔨᓴᖅᑕᐅᓂᖏᑦ
ᓇᓖᕌᕈᑎᒃᓴᖅ ᓂᕈᐊᖅᑕᐅᓯᒪᓕᖅᐸᑦ, ᓴᓇᔨᒻᒪᕇᑦ ᐱᓕᕆᔪᓐᓇᖅᓯᔪᓐᓇᖅᓯᕗᑦ. ᑕᐃᒪᓕ ᓄᐊᑦᑎᕙᓪᓕᐊᓕᕋᐃᒐᑦᑕ ᑐᑭᓯᒋᐊᕈᑎᒃᓴᐅᔪᓂᒃ ᓂᕈᐊᖅᑕᐅᓯᒪᔪᒥᒃ ᐃᓂᒃᓴᒥᒃ ᐱᓕᕆᐊᖑᓂᐊᖅᑐᒧᑦ. ᑲᑐᔾᔨᖃᑎᒌᑦ ᐅᐊᓕᓂᕐᒥᐅᑦ ᑭᓪᓕᓯᓂᐊᖅᑎᖏᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑎᒍᒥᐊᖅᑎᐅᔪᑦ ᖃᐅᔨᓴᕐᓂᕐᒧᑦ ᐸᕐᓇᐅᑎᓕᐅᖃᑦᑕᖅᑐᑦ ᑲᑐᔾᔨᓪᓗᑎᒃ. ᑕᐃᑲᓃᖃᑦᑕᖅᑐᑦ ᐊᒻᒪᓗ ᐃᓕᑉᐸᓪᓕᐊᖃᑎᒌᒃᖢᑎᒃ ᓄᓇᒥᒃ, ᐃᒪᕐᒥᒃ, ᐊᓄᕆᒥᒃ, ᓯᕿᓂᕐᒥᒃ, ᐆᒪᔪᓂᒃ, ᐱᕈᖅᑐᓂᒃ, ᐅᔭᕋᖕᓂᒃ, ᐊᒻᒪᓗ ᐃᓄᐃᑦ ᐱᖁᑎᑐᖃᖏᓐᓂᒃ ᑕᐃᔅᓱᒪᓂᑐᖃᖅ. ᑕᒪᓐᓇ ᑐᙵᕕᖃᖅᐳᖅ ᑎᑎᕋᐅᔭᕐᓂᕐᒧᑦ ᐊᒻᒪ ᓴᓇᔨᐅᓂᕐᒧᑦ; ᑕᐃᒪᓕ, ᓴᖅᑭᑦᑎᔪᓐᓇᖅᓯᕙᒃᐳᒍᑦ ᓇᖕᒥᓂᖃᕐᓂᕐᒧᑦ ᓇᓗᓇᐃᒃᑯᑕᕐᒥᒃ ᐱᓕᕆᐊᒧᑦ. ᓄᓇᕗᒻᒥ ᓄᑭᒃᓴᐅᑎᒃᑯᑦ ᑯᐊᐳᕇᓴᒃᑯᑦ ᐋᔩᖃᑎᖃᖃᑦᑕᖅᑐᑦ ᑳᓐᑐᕌᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐃᓱᒪᓕᐅᖁᓪᓗᒋᑦ ᖃᓄᖅ ᐃᒪᒃᑯᑦ ᐆᒻᒪᖅᑯᑏᑦ ᓂᐅᕕᖅᑕᐅᔪᓐᓇᕐᒪᖔᑕ ᓂᐅᕐᕈᑕᐅᔪᓐᓇᕐᒪᖔᑕᓗ, ᐊᒻᒪᓗ ᑲᓱᖅᑕᐅᓗᑎᒃ ᐱᑕᖄᓂᒃᑐᒧᑦ ᐆᒻᒪᖅᑯᑎᓄᑦ ᓄᓇᓕᓐᓄᑦ ᐊᑐᖅᑕᐅᔪᓐᓇᕐᓂᐊᕐᒪᑕ. ᖃᐅᔨᓴᖃᑦᑕᕐᒥᔪᒍᑦ ᐃᓅᓯᓕᕆᓂᕐᒧᑦ ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᓪᓗ ᖃᓄᖅ ᑖᓐᓇ ᐱᓕᕆᐊᖅ ᐊᑦᑐᐃᓂᖃᕋᔭᕐᒪᖔᖅ ᓄᓇᓕᓐᓂ ᐃᓅᓯᕐᒥᒃ, ᐃᓅᓇᓱᐊᕐᓂᕐᒧᑦ ᐊᑭᖓᓂᒃ, ᐱᕕᒃᓴᐅᔪᓂᒃ ᓄᓇᓕᓐᓂ ᓇᒻᒥᓂᖁᑎᖃᖅᑐᓄᑦ, ᐊᒻᒪᓗ ᐃᖅᑲᓇᐃᔮᒃᓴᓂᒃ.
ᑭᓱᓕᒫᑦ ᑐᓴᖅᑕᐅᑎᑕᐅᕙᑦᑐᑦ ᐃᓄᓐᓄᑦ ᐊᒻᒪᓗ ᑐᑭᓕᐅᖅᑕᐅᕙᑦᑐᑎᒃ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ. ᐊᒥᓱᐊᖅᑎᖅᑐᑎᒃ ᐅᖃᖃᑎᒌᒍᑕᐅᕙᑦᑐᑦ ᐃᓄᓐᓄᑦ ᐊᒃᑐᐊᓂᖃᖅᑐᓄᑦ ᑐᑭᓯᔪᓐᓇᕐᓂᐊᕋᑦᑕ ᐃᓱᒪᒋᔭᖏᓐᓂᒃ ᐊᒻᒪᓗ ᐱᔪᒪᔭᖏᓐᓂᒃ.
ᐊᐱᕆᕙᕗᑦ ᐃᓄᐃᑦ:
- ᖃᓄᐃᑦᑐᓂᒃ ᐃᑲᔫᑎᓂᒃ ᑕᑯᔪᒪᕕᑦ ᐊᒻᒪᓗ ᑕᑯᔭᕆᐊᖃᖅᐱᑦ?
- ᖃᓄᖅ ᖃᓄᖅᑑᕈᑎᖃᖁᔨᕕᓯ ᒥᑭᓪᓕᒋᐊᖅᑎᑦᑎᓂᕐᒥᒃ ᐊᒃᑐᐃᓂᐅᔪᓂᒃ?
- ᖃᓄᖅ ᑖᒃᑯᐊ ᐸᕐᓇᐅᑏᑦ ᐱᐅᓯᑎᒋᐊᕈᓐᓇᖅᐱᑎᒍᑦ?
ᑕᒪᓐᓇ ᐱᓕᕆᐊᖑᓲᖑᕗᖅ ᐅᑭᐅᓄᑦ ᒪᕐᕉᖕᓄᑦ ᐱᖓᓱᓄᒡᓗᓐᓃᑦ.
ᐃᓱᒪᓕᐅᕈᑎ
ᒫᓐᓇᐅᔪᕐᓕ, ᑐᑭᓯᓯᒪᑦᓯᐊᖅᑐᒍᑦ ᖃᓄᖅ ᑕᐅᑦᑐᖃᕐᓂᐊᕐᒪᖔᖅ ᐱᓕᕆᐊᖅ, ᖃᓄᖅ ᓴᓇᔭᐅᒐᔭᕐᒪᖔᖅ, ᐊᑦᑐᐃᓂᖃᑐᐃᓐᓇᕆᐊᓕᓐᓂᒃ ᐊᕙᑎᒧᑦ ᓂᕆᐅᒋᔭᐅᔪᓐᓇᖅᑐᓂᒃ, ᐊᒻᒪᓗ ᐸᕐᓇᐅᑏᑦ ᒥᑭᓪᓕᕚᓪᓕᖅᑎᑦᓯᒍᑎᑦᓴᖏᓐᓂᒃ ᐃᑲᔪᖅᑐᖅᑕᐅᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ. ᐋᖅᑭᒃᓯᒪᓂᖃᕐᒥᔪᒍᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᒃᓴᖏᓐᓄᓪᓗ ᐊᖏᖃᑎᒌᒍᑎᒥᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪᓗ ᖃᓄᑐᐃᓐᓇᖅ ᐃᓚᒋᐊᕈᑎᓂᒃ ᐸᕐᓇᐅᑎᓂᒃ ᑲᑐᔾᔨᓂᕐᒧᑦ ᐃᑲᔫᓯᐊᒃᓴᓂᒃ.
- ᓯᕗᓪᓕᖅᐹᖅ: ᑖᓐᓇ ᑐᓂᕙᒃᑕᕗᑦ ᐃᓄᖕᓄᑦ ᐊᐱᕆᓪᓗᑕᓗ: ᐊᖏᖃᑎᒋᕕᓯᐅᒃ ᑭᖑᓪᓕᖅᐹᒥ ᐃᑲᔫᑎᒃᓴᓂᒃ ᑲᑐᔾᔨᓂᕐᒧᑦ ᐊᖏᕈᑕᐅᓯᒪᔪᑦ, ᐊᒻᒪᓗ ᓈᒻᒪᒃᐸᑦ ᐸᕐᓇᐅᑎᑦᑎᓐᓄᑦ ᐊᐅᓚᑦᑎᓂᕐᒧᑦ ᐊᒃᑐᐃᓂᐅᑐᐃᓐᓇᕆᐊᓕᖕᓂᒃ ᐱᓕᕆᐊᖑᔪᒥᒃ? ᑕᐃᒪᐃᓐᖏᑉᐸᑦ, ᖃᓄᖅ ᖃᐅᔨᒪᒋᐊᕈᓐᓇᖅᐱᑕ ᑕᐃᒪᐃᖁᓪᓗᒋᑦ?
- ᐱᓕᕆᒋᐊᕈᑎ 2: ᐊᐱᕆᕙᕗᑦ ᑭᒃᑯᑐᐃᓐᓇᐃᑦ ᐊᒻᒪᓗ ᐱᔪᓐᓇᐅᑎᖃᖅᑐᑦ: ᑐᓂᓯᔭᕆᐊᖃᖅᐱᑕ ᐱᓕᕆᐊᒃᓴᒥᒃ ᓄᓇᕗᒻᒥ ᐊᕙᑎᔨᕆᓂᕐᒧᑦ ᑲᑎᒪᔩᑦ?
ᐃᑲᔫᑎᒃᓴᑦ
- Resource link 1
- Resource link 2
- Resource link 3
- Resource link 4
4. ᐱᔪᓐᓇᐅᑎᖃᕐᓂᖅ ᐊᒻᒪ ᑮᓇᐅᔭᓕᕆᓂᕐᒧᑦ ᐊᑐᐃᓐᓇᐅᓂᖅ
ᒫᓐᓇᐅᔪᖅ, ᐱᔭᕇᖅᓯᒪᓕᖅᑕᕗᑦ ᓯᕗᓪᓕᖅᐹᖅᓯᐅᑎᓕᒫᑦ. ᓇᓗᓇᐃᖅᓯᒪᑦᑎᐊᖅᑐᒥᒃ ᐃᑲᔪᖅᓱᖅᑕᐅᓯᒪᕗᒍᑦ ᐃᓄᓐᓂᑦ, ᐄ, ᑲᑐᑎᒋᐊᖃᕋᑦᑎᒍ ᐱᓕᕆᐊᒧᑦ ᐸᕐᓇᐅᑎᐅᔪᖅ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᒪᓕᒐᖅᑎᒍᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒧᑦ, ᐊᒻᒪ ᑐᔅᓯᕋᕐᓗᑕ ᐊᖏᖅᑕᐅᓂᕐᒥᒃ ᓴᓇᔭᐅᖁᓪᓗᒍ ᐱᓕᕆᐊᖅ. ᑐᕌᒐᕆᔭᕗᑦ ᑐᓂᔭᐅᔪᖅ ᒪᓕᖁᓗᒍ ᐱᓕᕆᐊᖑᓚᐅᖅᑐᒥᒃ ᐊᑕᐅᑦᑎᒃᑯᑦ ᐱᕙᓪᓕᐊᑎᑕᐅᓚᐅᖅᑐᒥᒃ ᐃᓄᓐᓄᑦ, ᐊᒻᒪᓗ ᑭᒡᒐᖅᑐᐃᓗᓂ ᐊᒥᓲᓂᖅᓴᐃᑦ ᐃᓄᐃᑦ ᐱᔪᒪᔭᖏᓐᓂᒃ. ᑐᓂᔭᐅᓚᐅᖅᑎᓪᓗᒍ, ᐅᑕᖅᑭᔭᕆᐊᖃᕐᓂᐊᖅᑐᒍᑦ ᑕᖅᑭᓂᒃ 12-ᓂᒃ, ᐃᓛᓐᓂᒃᑯᑦ ᐊᑯᓂᐅᓂᖅᓴᖅ, ᓄᓇᕗᒻᒥ ᐊᕙᑎᔨᕆᓂᕐᒧᑦ ᑲᑎᒪᔩᑦ ᓈᓚᓐᓂᖃᖁᓪᓗᒋᑦ, ᐃᓱᒪᔅᓴᖅᓯᐅᕈᑎᒋᓗᒋᑦ ᑐᑭᓯᒋᐊᕈᑎᓕᒫᑦ, ᐃᓱᒪᓕᐅᕈᑎᖃᕐᓗᑎᓪᓗ.
ᐅᑕᖅᑭᓂᑦᑎᓐᓂ ᓄᐊᑦᑎᕙᓪᓕᐊᖏᓐᓇᖅᑐᒍᑦ ᐊᕙᑎᓕᕆᓂᕐᒧᑦ ᑐᑭᓯᒋᐊᕈᑎᓂᒃ ᑐᑭᓯᕚᓪᓕᖁᓪᓗᑕ ᐊᑦᑐᐃᓂᕆᔪᓐᓇᖅᑕᖏᓐᓂᒃ ᐊᒻᒪᓗ ᑕᖅᑲᒃᑯᐊ ᐱᓕᕆᖃᑎᒋᕙᑦᑐᒋᑦ ᐃᓕᓐᓂᐊᖅᑎᑦᑎᓇᓱᐊᖅᑐᑕ ᑐᓴᖅᑎᑕᐅᕙᑦᑐᑕᓗ. ᐋᖅᑮᕙᒻᒥᔪᒍᑦ ᑮᓇᐅᔭᓕᕆᓂᕐᒧᑦ ᐸᕐᓇᒍᑎᒥᒃ ᓴᓇᔭᐅᓂᖓᓄᑦ ᐱᓕᕆᐊᖅ, ᐊᑐᐃᓐᓇᐅᓂᐊᖅᑐᒍᑦ, ᐊᖏᖅᑕᐅᓐᓂᕈᑦᑕ ᓄᓇᕗᒻᒥ ᐊᕙᑎᔨᕆᓂᕐᒧᑦ ᑲᑎᒪᔩᑦ. ᑕᒪᓐᓇ ᐃᓚᖃᖅᑐᖅ ᐅᖃᖃᑎᖃᕐᓂᕐᒥᒃ ᐊᑐᖅᑐᐊᖅᑎᑦᑎᔨᓂᒃ, ᑮᓇᐅᔭᒃᑯᕕᖕᓂᒃ, ᑲᓇᑕᐅᑉ ᒐᕙᒪᒃᑯᖏᓐᓂᒃ, ᐊᒻᒪᓗ ᓇᖕᒥᓂᖃᖃᑎᒋᔪᓐᓇᖅᑕᖏᓐᓂᒃ ᑮᓇᐅᔭᓂᒃ ᐃᓕᓯᔪᓐᓇᖅᑐᓂᒃ.
ᐃᓱᒪᓕᐅᕈᑎ
ᓄᓇᕗᒻᒥ ᐊᕙᑎᔨᕆᓂᕐᒧᑦ ᑲᑎᒪᔩᑦ ᓴᒃᑯᐃᑉᐸᑕ ᐱᓕᕆᐊᔅᓴᒥᒃ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒥᒃ, ᐊᒻᒪᓗ (ᑐᓐᖓᕕᖃᕐᓗᓂ ᒪᓕᒐᖅᑎᒍᑦ ᓈᓚᓐᓂᐅᔪᓂᒃ ᐃᓄᓐᓂᒃ) ᐊᖏᕈᑎᖃᖅᐸᑕ ᑲᔪᓯᒋᐊᕈᓐᓇᖁᓪᓗᒍ, ᑕᐃᓐᓇ ᐃᓱᒪᓕᐅᕈᑕᐅᓯᒪᔪᖅ ᑐᓂᕙᑦᑕᕗᑦ ᐃᓄᐃᑦ ᓯᕗᓕᖅᑎᖏᓐᓄᑦ.
ᕿᑭᖅᑕᓂᒃᑯᑦ ᕿᑭᖅᑕᓂᓗ ᑯᐊᐸᕇᓴᒃᑯᑦ ᐊᖓᔪᖅᑳᖏᑦ ᐊᐱᕆᕙᕗᑦ: ᓄᓇᕗᒻᒥ ᓄᒃᑭᒃᓴᐅᑏᑦ ᑯᐊᐳᕇᓴᖓ ᑮᓇᐅᔭᖃᖅᑎᑦᓯᒋᐊᖃᖅᑲᑦ ᓴᓇᔭᐅᓂᖓᓄᑦ ᑖᑦᓱᒪ ᐱᓕᕆᐊᑉ?
ᐄᖑᑉᐸᑦ, ᐅᑎᖅᑎᑦᑎᕙᑉᐳᑦ ᐊᑎᓕᐅᖅᓯᒪᔪᒥᒃ ᐊᔾᔨᖓᓂᒃ ᐱᔪᓐᓇᐅᑎᒥᓂᒃ ᑎᓕᓯᔾᔪᑎᒥᓂᓪᓗ ᑲᔪᓯᖁᔭᐅᓪᓗᑎᒃ.
ᐃᑲᔫᑎᒃᓴᑦ
- Resource link 1
- Resource link 2
- Resource link 3
- Resource link 4
5. ᓴᓇᔭᐅᓂᖓ
ᓴᓇᔭᐅᔭᕆᐊᖃᓕᕐᒪᑦ ᐱᓕᕆᐊᒃᓴᖅ!
ᑕᒪᓐᓇ ᐱᓕᕆᐊᔅᓴᖃᕈᓘᔭᖅᑎᑦᓯᔪᖅ, ᐊᒻᒪᓗ ᐃᖅᑲᓇᐃᔮᔅᓴᒻᒪᕆᐊᓗᓐᓂᑦ ᐃᓄᓐᓄᑦ. ᐊᖅᑯᑎᓕᐅᕆᐊᖃᖅᐳᑦ ᑕᐃᑯᖓ ᐃᓂᒃᓴᖓᓄᑦ, ᐱᖃᓯᐅᑎᓗᒍ ᐅᐊᔭᖓ ᐆᒻᒪᖅᑯᑎᓄᑦ ᓄᑖᕈᕆᐊᖅᑕᐅᔪᓐᓇᖅᑐᓄᑦ ᐆᒻᒪᖅᑯᑎᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐆᒻᒪᖅᑯᑎᖃᕐᕕᖓᓄᑦ.
ᐊᒥᓱᐊᓗᓐᓂᒃ ᐅᐊᔭᓕᕆᓂᕐᒧᑦ ᐱᓕᕆᐊᖃᕆᐊᖃᕐᒪᑕ ᑲᓱᖅᓯᒪᕕᖓᓂ, ᑕᐃᒃᑯᐊ ᐅᐊᔭᐃᑦ ᐊᑦᑕᓇᓐᖏᑦᑐᒥᒃ ᐱᔪᓐᓇᖁᓪᓗᒋᑦ ᓄᑖᒥᒃ ᐆᒻᒪᖅᑯᑎᒥᒃ. ᐃᓪᓗᒃᓴᐃᑦ ᓇᓂᔭᐅᔭᕆᐊᓖᑦ ᐅᕝᕙᓘᓐᓃᑦ ᓴᓇᔭᐅᔭᕆᐊᓖᑦ ᓴᓇᔨᓕᒫᓄᑦ, ᐱᖃᓯᐅᑎᓗᒋᑦ ᓄᓇᓕᓐᓂ ᐃᓄᐃᑦ ᐃᖅᑲᓇᐃᔭᖅᑐᑦ. ᐊᕐᕌᒎᓐᓂᒃ ᒪᕐᕉᓐᓂᒃ ᐊᑯᓂᐅᑎᒋᓂᐊᖅᑐᖅ, ᑭᓯᐊᓂ ᐃᒻᒪᖃ ᐅᖓᑖᓄᑦ, ᒪᓕᓪᓗᒋᑦ ᖃᓄᐃᑦᑐᓂᒃ ᐊᒃᓱᕈᕐᓇᖅᑐᓂᒃ ᓵᙵᔭᖃᕐᓂᐊᕐᒪᖔᑕ.
ᐃᑲᔫᑎᒃᓴᑦ
- Resource link 1
- Resource link 2
- Resource link 3
- Resource link 4
6. ᐱᖁᑏᑦ ᐊᐅᓚᑕᐅᓂᖏᑦ
ᓴᓇᔭᐅᔭᕇᖅᐸᑦ, ᐊᑐᐃᓐᓇᐅᓕᕐᓂᐊᖅᑐᒍᑦ “ᖃᒥᑦᑎᓗᑕ” ᐊᒻᒪᓗ ᐊᐅᓪᓚᖅᑎᑦᑎᓗᑕ ᓄᑖᕈᕆᐊᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᓄᓇᓕᓐᓄᑦ. ᑕᐃᒪᓕ ᑭᒃᑯᓕᒫᓄᑦ ᐅᑕᖅᑭᔭᐅᓯᒪᕗᖅ.
ᐆᒻᒪᖅᑯᑏᑦ ᓂᐅᕕᐊᖑᓂᐊᖅᑐᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓂᐅᕕᐊᔅᓴᖃᖃᑦᑕᖅᑐᓄᑦ ᓂᐅᕕᐊᔅᓴᖃᕐᓂᐊᖅᑐᑦ, ᑕᐃᒪᐃᖏᓐᓇᐅᔭᕐᒪᑕ. ᑕᐃᒪᓕ ᐊᐅᓚᓂᖃᓕᖅᐸᑦ ᑖᓐᓇ ᓄᑖᖅ ᐱᖁᑎᕐᔪᐊᖅ ᐃᖅᑲᓇᐃᔭᖅᑎᖃᕆᐊᖃᕐᓂᐊᖅᑐᖅ ᑭᓱᓕᒫᑦ ᐊᐅᓚᓂᖃᑦᑎᐊᖁᓪᓗᒋᑦ ᐋᖅᑭᒃᓱᐃᖃᑦᑕᕐᓗᑎᓪᓗ ᐊᑲᐅᙱᓕᐅᕈᑎᓂᒃ ᓴᖅᑭᖅᑐᖃᓕᕌᖓᑦ ᐊᒻᒪᓗ ᐋᖅᑭᐅᒪᐃᓐᓇᕈᑎᓂᒃ ᑲᒪᒋᔭᖃᖃᑦᑕᕐᓗᑎᒃ.