ᐅᕙᒍᑦ ᒥᒃᓵᓄᑦ

ᕼᐃᐅᕆ ᕙᓚᐅᕋᑎ (ᓄᓇᕗᑦᒥ ᓄᒃᑭᖅᓴᖅᑏᑦ ᐊᖏᔪᖅᑳᖓ ᐊᒻᒪᓗ ᑐᑭᒧᐊᒃᑎᖓ) ᓴᓂᑭᓗᐊᕐᒧᓚᐅᖅᓯᒪᔪᖅ ᕿᑭᖅᑕᓂ ᐊᕕᑦᑐᖅᓯᒪᔪᓂᑦ ᐳᓚᕋᖅᖢᓂ. ᓄᓇᓕᓕᒫᓂ ᐊᐱᖅᓱᖃᑦᑕᓚᐅᖅᑐᖅ, “ᐃᓄᐃᑦ ᓱᓇᓂᒃ ᐱᔭᕆᐊᖃᖅᐸᑦ, ᕿᑭᖅᑖᓗᒃ ᑯᐊᐳᕇᓴᒃᑯᓐᓂᒃ (QC) ᖃᓄᐃᓕᐅᖁᔨᕕᓯ?”
ᓴᓂᓗᐊᕐᒥᐅᑦ ᑭᐅᓚᐅᖅᑐᑦ: “ᐆᒻᒪᖅᑯᑎᑖᒃᑲᓐᓂᕈᓐᓇᖅᑐᓂᒃ ᐱᔪᒪᒐᑦᑕ, ᑭᒃᑯᓕᒫᑦ ᖃᐅᔨᒪᖕᒪᑕ ᐊᓄᕆ ᓴᙱᔪᐊᓘᖕᒪᑦ ᓴᓂᑭᓗᐊᕐᒥ, ᐊᑐᕆᐊᖃᖅᑕᕗᑦ ᐆᒻᒪᖅᑯᑎᓕᐅᕈᑎᒋᓗᒋᑦ, ᑐᕚᖃᑐᐃᓐᓇᖏᓪᓗᑕ ᐅᖅᓱᐊᓗᑐᐃᓐᓇᕐᓂᒃ ᐊᐅᓚᐅᑎᓂᒃ, ᑕᐃᒪᓐᓇ ᓱᕈᕐᓇᖅᑐᓂᒃ ᓄᖅᑲᖅᑎᑦᑎᔪᓐᓇᕋᑦᑕ ᐃᑭᑦᑎᓂᒃᑯᑦ ᐅᖅᓱᐊᓗᖕᒥᒃ, ᐊᒻᒪᓗ ᐱᓕᕆᖃᑕᐅᓗᑕ ᓴᐳᑎᓯᒪᓗᒍ ᓄᓇ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.”

ᕼᐃᐅᕆ ᐃᖃᓗᖕᓄᑦ ᐅᑎᓚᐅᖅᑐᖅ ᐊᒻᒪᓗ ᐅᖃᖃᑎᒋᓪᓗᓂᒋᑦ ᕿᑭᖅᑕᓂ ᑯᐊᐳᕇᓴᒃᑯᑦ ᑲᑎᒪᔨᖏᑦ. ᐃᓐᓇᐃᑦ ᓲᕐᓗ ᓘᑎ ᐳᑦᓗᒃ ᐊᒻᒪ ᒨᓯᓯ ᐊᐸᖅᑲᖅ ᐊᖏᖃᑎᖃᓚᐅᖅᐳᑦ ᓴᓂᑭᓗᐊᕐᒥᐅᑦ ᑕᐅᑐᙳᐊᖅᑕᖓᓂᒃ ᐱᕙᓪᓕᐊᑎᑦᑎᓂᕐᒥᒃ ᐃᓄᖕᓄᑦ ᓯᕗᓕᖅᑕᐅᔪᒥᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᐃᓕᐅᕈᑎᒃᓴᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ.

ᓴᖅᑮᓚᐅᖅᑐᑦ ᓄᑖᒥᒃ ᐊᑕᖏᖅᑐᒥᒃ ᓇᖕᒥᓂᕆᔭᐅᔪᒥᒃ ᑎᒥᖁᑎᒥᒃ ᐊᑖᓂ ᕿᑭᖅᑖᓗᒃ ᑯᐊᐳᕇᓴᓐ—ᓄᓇᕗᑦ ᓄᑭᒃᓴᐅᑏᑦ ᑯᐊᐳᕇᓴᓐ (NNC). ᓄᒃᑭᒃᓴᐅᑏᑦ ᑐᑭᓕᒃ ᓴᙱᓂᖅ ᐃᓄᒃᑎᑐᑦ. ᐃᒪᖅ, ᐊᓄᕆ, ᓯᕿᓂᕐᓗ ᓴᙱᔪᒻᒪᕆᐅᕗᑦ ᓄᓇᓕᖕᓂ ᐱᖁᑎᒋᔭᐅᔪᑦ. “ᖃᓄᕐᓕ ᓴᖅᑭᑦᑎᔪᓐᓇᕈᑦᑕ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ ᓄᒃᑎᕆᓂᕐᒥᒃ ᕿᑭᖅᑕᓂ ᐊᕕᒃᑐᖅᓯᒪᔪᓕᒫᒥ?” ᐃᓱᒪᓚᐅᖅᑐᖅ ᕼᐃᐅᕆ. ᐊᑭᑭᓐᓂᖅᓴᐅᓇᔭᖅᑐᖅ, ᐃᖏᕐᕋᓂᖅᓴᐅᓇᔭᖅᑐᖅ ᓄᓇᒧᑦ ᐃᒪᕐᒧᓪᓗ, ᑮᓇᐅᔭᖃᕐᓂᖅᓴᐅᓗᓂ ᓄᓇᕗᑦᒥ, ᐅᖅᓱᐊᓗᖕᒧᑦ ᐃᑲᔫᓯᐊᖅᑖᕆᐊᖃᕈᓐᓃᕐᓗᓂ ᓄᓇᕗᑦ ᒐᕙᒪᒃᑯᖏᓐᓂᑦ, ᐃᖅᑲᓇᐃᔮᒃᓴᓂᒃ ᓴᖅᑭᑎᑦᑎᓗᓂ ᐊᒻᒪᓗ ᑮᓇᐅᔭᓕᐅᕈᑎᓂᒃ ᑲᑐᔾᔨᓂᕐᒥᒃ ᐃᓄᖕᓄᑦ, ᐊᒻᒪᓗ ᐊᐅᓚᑕᐅᓗᓂ ᐃᓄᖕᓄᑦ.

ᑕᐅᑐᙵᐊᓚᐅᖅᑕᕋ ᐱᔪᓐᓇᕐᓂᕆᔭᐅᔪᖅ. ᓯᐅᓪᑕᓐ ᓂᒻᓴᒃ (ᐊᐅᓚᑦᑎᔨ ᐱᓕᕆᐊᒃᓴᓄᑦ ᐊᐅᓚᑦᑎᔨ ᕿᑭᖅᑖᓗᖕᒥ ᓇᖕᒥᓂᖁᑎᓕᖕᓄᑦ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᒃᑯᓐᓄᑦ), ᓯᕗᓕᖅᑎᐅᓚᐅᖅᑐᖅ ᐱᓕᕆᐊᒃᓴᓄᑦ ᐱᒋᐊᖅᑎᑦᑎᓂᕐᒧᑦ ᐊᒻᒪ ᑮᓇᐅᔭᓂᒃ ᐱᓇᓱᐊᕐᓂᕐᒧᑦ. ᐅᒃᐱᕈᓱᓚᐅᖅᑐᖅ ᕼᐃᐅᕆᐅᑉ ᑕᐅᑐᙳᐊᖅᑕᖓᓂᒃ, ᐊᒻᒪᓗ ᓴᙱᔪᒥᒃ ᑐᕚᓕᐅᓚᐅᖅᑐᖅ ᑲᒻᐸᓂᐅᔪᖅ ᐱᕈᖅᐸᓪᓕᐊᔪᓐᓇᖁᓪᓗᒍ.

ᑕᐃᒪᓕ ᑎᑭᑎᑦᑎᔭᕆᐊᖃᓕᓚᐅᕋᑦᑕ ᖃᐅᔨᒪᓂᐅᔪᓂᒃ ᐆᒻᒪᖅᑯᑎᓂᒃ ᐱᕙᓪᓕᐊᑎᑦᑎᓂᕐᒧᑦ ᖃᓪᓗᓈᑦ ᓄᓇᖓᓐᓂ. ᑕᒪᒃᑯᐊ ᐱᓕᕆᐊᑦ ᓴᓇᔭᐅᓚᐅᖅᓯᒪᙱᒻᒪᑕ ᓄᓇᕗᑦᒥ, ᑕᐃᒪᐃᒻᒪᑦ ᓄᓇᕗᑦ ᓄᑭᒃᓴᐅᑎᒃᑯᑦ ᑯᐊᐳᕇᓴᖓᑦ ᓇᓂᓯᓪᓗᑕ ᐃᓄᖕᓂᒃ ᑕᒪᒃᑯᓂᖓ ᐊᔪᙱᓐᓂᐅᔪᓂᒃ ᐅᑭᐅᖅᑕᖅᑐᒨᖅᑎᑦᑎᔪᓐᓇᖅᑐᓂᒃ. ᐃᖅᑲᓇᐃᔭᖅᑎᑖᓚᐅᖅᐳᑦ ᖃᐅᔨᒪᔪᒻᒪᕆᒻᒥᒃ ᑐᑭᒧᐊᖅᑎᑦᑎᔨᒥᒃ, ᓴᖅᑮᓕᖅᖢᓂᓗ ᐱᒻᒪᕆᐅᔪᓂᒃ ᑲᑐᔾᔨᖃᑎᒌᓐᓂᕐᒥᒃ ᑳᓐᑐᕌᒃᑎᓂᒃ ᐃᑲᔪᕈᓐᓇᖅᑐᓂᒃ ᐊᐅᓚᑦᑎᓂᕐᒥᒃ ᐊᒻᒪ ᓴᓇᓂᕐᒥᒃ ᐱᓕᕆᐊᓂᒃ. ᑕᒪᓐᓇ ᐅᖃᐅᓯᖅ ᓯᐊᒻᒪᐸᓪᓕᐊᓕᓚᐅᖅᑐᖅ ᐅᑭᐅᖅᑕᖅᑐᓕᒫᒧᑦ ᐊᒻᒪᓗ ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᓄᓇᕗᑦᒥ ᓄᒃᑭᒃᓴᐅᑏᑦ ᑯᐊᕈᕇᓴᒃᑯᑦ ᖃᓄᐃᓕᐅᕐᓂᕆᔭᖏᓐᓂᒃ.

ᐃᖃᓗᖕᓂ ᐃᒪᕐᒧᑦ ᐆᒻᒪᖅᑯᓯᐅᕐᓂᖅ (ᐱᒋᐊᖅᑕᐅᓚᐅᖅᓯᒪᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᕐᕌᒍᒐᓴᐃᑦ ᐊᓂᒍᖅᓯᒪᓕᖅᑐᑦ) ᐊᖁᑎᑖᕆᐊᖃᓚᐅᖅᓯᒪᖕᒪᑕ. ᓄᓇᕗᑦᒥ ᓄᑭᒃᓴᐅᑎᒃᑯᑦ ᑯᐊᐳᕇᓴᒃᑯᑦ ᖃᐃᖁᔭᐅᓚᐅᖅᐳᑦ ᕿᒥᕐᕈᖁᔭᐅᓪᓗᑎᒃ ᐱᕕᒃᓴᐅᔪᒥᒃ ᓄᑖᓂᒃ ᑲᒪᔨᑖᕐᓗᑎᒃ ᐊᒻᒪᓗ ᓯᕗᓕᖅᑎᐅᖁᔭᐅᓪᓗᑎᒃ ᐱᓕᕆᐊᒃᓴᒧᑦ ᑲᑐᔾᔨᖃᑎᖃᕐᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ. ᑐᑭᓯᐅᒪᓂᖅᓴᐅᖁᓪᓗᒋᑦ ᐊᑐᒃᑲᓐᓂᕈᓐᓇᖅᑐᓂᒃ ᕿᑭᖅᑕᓂ ᐊᕕᒃᑐᖅᓯᒪᔪᓂ, ᓄᓇᕗᑦᒥ ᐆᒻᒪᖅᑯᑎᓕᕆᔨᒃᑯᑦ ᐊᕕᒃᑐᖅᓯᒪᔪᓂ ᓯᕿᓂᕐᒥᒃ ᑎᓂᓐᓂᕐᒧᓪᓗ ᐆᒻᒪᖅᑯᑎᓂᒃ ᖃᐅᔨᓴᓚᐅᕐᒥᔪᑦ. ᓴᓇᓚᐅᖅᐳᑦ ᐆᒃᑑᑎᓂᒃ ᖁᓛᒍᑦ ᓯᕿᓂᕐᒥᒃ ᐊᑐᕐᓂᕐᒧᑦ ᐱᓕᕆᐊᒃᓴᓄᑦ ᑕᒪᐃᓐᓂ 13-ᓂ ᓄᓇᓕᖕᓂ, ᓂᑭᑦᑖᕈᑕᐅᓪᓗᑎᒃ ᑕᒪᐃᓐᓄᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ. ᐊᒻᒪᓗ ᑕᓪᓕᒪᓄᑦ ᓄᓇᓕᖕᓄᑦ ᑎᓂᓐᓂᒃᑯᑦ ᐆᒻᒪᖅᑯᑎᖃᕐᓂᖅ ᓴᙱᔪᐊᓘᓂᐊᕋᓱᒋᔭᐅᓚᐅᖅᑐᖅ (ᖃᐅᓱᐃᑦᑐᖅ, ᓴᓂᕋᔭᒃ, ᐃᒡᓗᓕᒃ, ᑭᙵᐃᑦ, ᐊᒻᒪᓗ ᑭᖕᒥᕈᑦ), ᓄᓇᒥ ᐱᓕᕆᓚᐅᖅᑐᑦ ᑲᑦᑎᖅᓱᐃᓪᓗᑎᒃ ᑎᓂᓐᓂᒃᑯᑦ ᑐᑭᓯᒋᐊᕈᑎᒃᓴᓂᒃ.

ᐃᑲᔪᖅᑕᐅᒃᑲᓐᓂᕆᐊᖃᓚᐅᖅᑐᑦ ᐊᐅᓚᑦᑎᓂᕐᒧᑦ, ᐊᔭᐅᖅᑐᐃᓂᕐᒧᑦ, ᓄᓇᓕᖕᓂᒃ ᐃᓚᐅᑎᑦᑎᓂᕐᒧᑦ, ᐊᒻᒪᓗ ᐊᑯᓂᐅᔪᒧᑦ ᐸᕐᓇᐅᕐᓂᕐᒧᑦ. ᑕᐱᕇᑦ ᐱᕈᖅᐸᓪᓕᐊᓕᓚᐅᖅᐳᑦ, ᐊᒻᒪᓗ ᑲᑐᔾᔨᓪᓗᑎᒃ, ᐱᒋᐊᖅᑕᐅᓚᐅᖅᑐᖅ ᓄᓇᓕᖕᒨᖓᔪᒥᒃ ᐱᓕᕆᐊᒃᓴᖅ ᑭᙵᕐᓂ, ᖃᐅᓱᐃᑦᑐᖅᒥ ​​ᐊᒻᒪᓗ ᓴᓂᕋᔭᖕᒥ. ᓄᓇᕗᑦᒥ ᓄᒃᑭᒃᓴᐅᑏᑦ ᑯᐊᐳᕇᓴᒃᑯᑦ  ᓯᕗᓪᓕᖅᐹᒥ ᐃᒡᓗᕐᔪᐊᑉ ᐊᖏᓂᖓ ᐱᓕᕆᐊᖑᔪᖅ ᐱᐊᓂᒃᑕᐅᓚᐅᖅᐳᖅ—ᐆᒻᒪᖅᑯᑎᑐᓗᐊᙱᓐᓂᖅᓴᓂᒃ ᓄᑖᙳᕆᐊᖅᑎᑦᑎᓂᖅ ᐊᒻᒪ ᓯᕿᓂᕐᒧᑦ ᐆᒻᒪᖅᑯᑎᑖᕈᑎ ᐋᖅᑭᒃᓯᒪᔪᖅ ᐃᒡᓘᑉ ᖄᖓᓐᓂᒃ ᓄᓇᕗᑦᒥ ᓯᓚᑦᑐᖅᓴᕐᕕᐅᑉ ᐃᓕᓐᓂᐊᖅᑐᓄᑦ ᐃᒡᓗᖁᑎᖓᓐᓂᒃ ᐃᖃᓗᖕᓂ. ᑖᒃᑯᐊ ᑲᑐᔾᔨᖃᑎᒌᑦ ᑲᔪᓯᑦᑎᐊᖅᑐᒃᑯᑦ ᐊᔭᐅᖅᑐᐃᓚᐅᖅᑐᑦ ᓴᖅᑭᑦᑎᖁᔨᓪᓗᑎᒃ ᓄᑖᓂᒃ ᒐᕙᒪᒃᑯᑦ ᐊᑐᐊᒐᖏᓐᓂᒃ, ᑕᐃᒪᓐᓇ ᓂᐅᕐᕈᑎᖃᕈᓐᓇᕋᔭᕐᒪᑕ ᐆᒻᒪᖅᑯᑎᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ.

ᓴᓇᔭᐅᕙᓪᓕᐊᓕᓚᐅᖅᑐᖅ ᓄᓇᑦᒻᒥ ᓄᑭᒃᓴᐅᑏᑦ ᑯᐊᐳᕇᓴᒃᑯᑦ ᓯᕗᓪᓕᐹᑦᑎᐊᒥᑦ ᓄᓇᓕᖕᓂᑦ ᐊᖏᑎᒋᔪᒥ ᐱᓕᕆᐊᖑᔪᒥ: ᐊᓄᕆᕐᔪᐊᖅ ᓄᑭᒃᓴᐅᑏᑦ ᐱᓕᕆᐊᖅ ᓴᓂᑭᓗᐊᕐᒥᑦ. ᓯᕗᓪᓕᖅᐹᑦᑎᐊᖅ ᐊᓄᕆᒧᑦ ᐹᑕᓖᒃᑯᓪᓗ ᐆᒻᒪᖅᑯᑎᖃᕐᓂᖅ ᓄᓇᕗᑦᒥ. ᓴᓇᔭᐅᕙᓪᓕᐊᓕᓚᐅᕐᒥᔪᖅ ᖁᓛᓂ ᓯᕿᓂᕐᒥᒃ ᐊᑐᕐᓂᕐᒧᑦ ᐱᓕᕆᐊᖑᔪᖅ ᐊᖅᓴᕐᓃᑦ ᑐᔪᕐᒥᕕᒃᓴᖓᓄᑦ ᐃᖃᓗᖕᓂ. ᓄᓇᕗᑦ ᓄᒃᑭᒃᓴᐅᑎᖏᑦ ᑯᐊᐳᕇᓴᒃᑯᑦ ᓴᖑᕙᓪᓕᐊᓕᓚᐅᖅᑐᑦ ᐃᓗᐊᓃᑦᑐᓄᑦ ​​ᐱᓕᕆᐊᓄᑦ ᐊᐅᓚᑦᓯᔾᔪᑎᓄᑦ ᓄᓇᓕᖕᓂᑦ, ᐃᓄᐃᑦ ᐱᔪᒪᔭᖏᑦ ᓯᕗᓪᓕᐅᔾᔭᐅᖁᓪᓗᒋᑦ ᐱᕙᓪᓕᐊᑎᑦᑎᓂᕐᒥᑦ. ᓄᓇᕗᑦᒥ ᓄᑭᒃᓴᐅᑏᑦ ᑯᐊᐳᕇᓴᒃᑯᑦ ᓂᕈᐊᖅᑎᑦᑎᓚᐅᖅᐳᑦ ᐃᖃᓗᖕᓂ, ᓯᕗᓪᓕᖅᐹᖑᓪᓗᓂ ᑕᐃᒪᐃᑦᑐᒥᒃ, ᓴᙱᓂᖅᑖᖅᑎᑦᑎᓪᓗᑎᒃ ᓄᓇᓕᖕᒥᐅᓂᒃ ᓂᕈᐊᕈᓐᓇᕐᖢᑎᒃ ᓇᓕᐊᖕᓂᒃ ᓄᑖᖑᖅᐸᓪᓕᐊᔪᓂᒃ ᐊᒻᒪ ᐃᓂᒃᓴᒥᒃ ᐊᑐᕈᒪᔭᒥᓂᒃ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᓄᑦ ᐱᓕᕆᐊᒃᓴᒥᓄᑦ.

ᑭᙵᕐᓂᒃ, ᖃᐅᓱᐃᑦᑐᕐᒥᒃ, ᓴᓂᕋᔭᖕᒥᓪᓗ ᓂᕈᐊᕐᓂᖃᓚᐅᖅᐳᑦ, ᐃᓄᐃᑦ ᑖᒃᑯᓇᓂ ᓄᓇᓕᖕᓂ ᓂᕈᐊᕈᓐᓇᖅᑎᑕᐅᓪᓗᑎᒃ ᓇᓕᐊᖕᓂ ᐱᓕᕆᔾᔪᑎᓂᒃ ᓴᓇᔪᒪᖕᒪᖔᑕ. ᐱᒻᓚᕆᐅᔪᒥᒃ ᓄᓇᕗᑦᒧ ᕼᐃᐅᕆ ᕕᓚᐅᕋᑎ , ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᒃᑯᑦ ᑐᑭᒧᐊᖅᑎᖓ ᐊᒻᒪᓗ ᐊᖓᔪᖅᑳᖅ, ᐊᑎᓕᐅᓚᐅᖅᐳᖅ ᓄᓇᕗᑦ ᓯᕗᓪᓕᖅᐹᑦᑎᐊᒥ ᐆᒻᒪᖅᑯᑎᒥᒃ ᓂᐅᕕᕐᓂᕐᒧᑦ ᐊᖏᖃᑎᒌᒍᑎᒥᒃ ᐊᐅᓚᑦᑎᔨᒻᒪᕆᖓᓐᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ. ᑕᒪᓐᓇ ᓇᓗᓇᐃᖅᓯᓚᐅᖅᐳᖅ ᐱᒋᐊᓪᓚᕆᖕᓂᖓᓂᒃ, ᑮᓇᐅᔭᓕᐅᐸᓱᖕᓂᕐᒧᑦ ᒪᓕᒐᑎᒍᓪᓗ, ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒥᒃ ᓅᑉᐸᓪᓕᐊᓂᕐᒥᒃ ᕿᑭᖅᑖᓗᖕᒥ.

1ᒥᒐ ᕚᑦ ᐊᓄᕆᓯᐅᑎ ᓴᓂᑭᓗᐊᕐᒧᐊᖅᑕᐅᓚᐅᖅᐳᖅ ᓇᑐᓚᓐᒥᒃ, ᒪᒃᑯᒃᑐᓪᓗ ᓴᓂᑭᓗᐊᕐᒥᐅᑦ ᒑᔅᐲ, ᑯᐸᐃᒃᒨᓚᐅᖅᓯᒪᕗᑦ, ᐊᓄᕆᒨᖅᑐᓂᒃ ᐱᓕᕆᔨᐅᓂᕐᒧᑦ ᐱᓕᒻᒪᒃᓴᕐᓂᒃ. ᐃᖃᓗᐃᑦ ᓄᒃᑭᒃᓴᐅᑏᑦ ᐱᓕᕆᐊᖅ ᑕᐅᔭᐅᓚᐅᖅᐳᖅ ᑲᓇᑕᐅᑉ ᒐᕙᒪᖓᑦᑕ ᑲᓇᑕᒥ−ᐋᖅᑭᒃᓱᐃᕙᓪᓕᐊᓂᕐᒧᑦ ᐱᓕᕆᐊᖑᔪᓄᑦ ᑎᑎᕋᖅᓯᒪᔪᓄᑦ, ᑲᓇᑕᓕᒫᒥ ᐃᓕᓴᕆᔭᐅᓯᒪᓪᓗᓂ ᐱᒻᒪᕆᐅᓂᖓᓐᓄᑦ ᐃᓚᒋᔭᐅᓪᓗᓂ ᐅᑭᐅᖅᑕᖅᑐᒥ ᓇᖕᒥᓂᖃᕐᓂᕐᒧᑦ ᑮᓇᐅᔭᓕᐅᕋᓱᖕᓂᕐᒧᓪᓗ ᐋᖅᑭᒋᐊᕈᑎᐊᕐᓂᖅ ᐃᓄᖕᓂ.